O destino Galicia presentouse este ano na feira Matka Nordic Travel Fair, en Helsinki (Finlandia), un dos certames máis importantes do mercado emisor dos países nórdicos, para promover neste territorio a oferta turística galega.

Trátase do maior evento da industria de viaxes no norte de Europa e a rexión do Báltico que atrae tanto profesionais do comercio internacional de viaxeiros como axencias de viaxes e operadores turísticos, así como o público en xeral interesado en viaxar.

 Turismo de Galicia estivo presente nesta reunión comercial na que fixo fincapé na promoción do Camiño de Santiago e os produtos relacionados coa natureza e a cultura.

Ademais, o departamento de Turismo da Xunta promoveu a enogastronomía de Galicia como un dos segmentos máis destacados para o público do norte de Europa.

Así mesmo, no marco desta feira, Turismo de Galicia mantivo varias xuntanzas con operadores turísticos finlandeses, interesados en distintos produtos e servizos turísticos galegos.

Mercado finlandés

Trátase dun mercado con moito potencial xa que a demanda turística finlandesa está a incrementarse nos últimos anos.

Así, nos once primeiros meses do pasado ano Galicia rexistrou preto de 7.000 viaxeiros aloxados procedentes de Finlandia que realizaron case 10.500 pernoitas nos establecementos hoteleiros da Comunidade galega.

Ademais, no ámbito do Camiño de Santiago, selaron a súa Compostela no 2016 un total de 868 peregrinos finlandeses.