Distintos lugares de Galicia acollen sesións informativas organizada por Turismo de Galicia co obxectivo de dar a coñecer en profundidade a novo decreto que regulará as vivendas de uso turístico en Galicia.

A nova norma entrará en vigor o próximo 10 de maio trala modificación realizada polo Estado na Lei de Arrendamentos Urbanos, obrigando as Comunidades Autónomas a que exerzan a súa competencia exclusiva para a regulación de vivendas de alugueiro de uso turístico.

Así, o decreto cubrirá o baleiro legal ocasionado pola exclusión desta tipoloxía erradicando as problemáticas máis relevantes vinculadas á tendencia de alugar por días ou semanas a vivenda habitual para fins turísticos.

Esta regulación cumpre unha demanda tanto do sector hoteleiro como do sector de aluguer de vivendas de uso turístico, as administracións, consumidores e usuarios ao ofrecer un marco de seguridade xurídica.

Turismo de Galicia busca, así, impulsar o rexistro de vivendas de uso turístico en Galicia enriquecendo a oferta de aloxamento turístico da nosa comunidade.

Vivendas de uso turístico

O novo decreto define as vivendas de uso turístico como aquelas cedidas a terceiras persoas de xeito reiterado –dúas o máis veces ao ano- e a cambio de contraprestación económica, para unha estadía de curta duración –inferior a trinta días consecutivos- e amobladas e equipadas en condicións de inmediata dispoñibilidade.

Para o inicio da súa actividade, o decreto establece simplemente a obrigatoriedade de presentar unha declaración responsable ante a Área Provincial de Turismo de Galicia na que radique a vivenda, e a súa inscrición no Rexistro de Empresas e Actividades Turísticas da Comunidade Autónoma de Galicia (REAT).