Nava Castro, directora de Turismo da Xunta, foi a encargada da súa presentación no stand de Galicia, onde sinalou que a paisaxe é unha das principais motivacións dos turistas á hora de visitarnos. En conxunto, esta escolma percorre máis de 900 quilómetros, principalmente a través de estradas secundarias e locais de baixa intensidade de tráfico. Así, Escenarios ao volante acada 110 concellos, e inclúe sete “olladas urbanas” ás principais cidades.

 

“Son itinerarios de costa e do interior para descubrir a Galicia azul e a Galicia verde que se transforman segundo as tempadas, polo que un mesmo percorrido pode cambiar se o facemos en outono ou en primavera”, declarou sobre este produto deseñado para os 365 días do ano. Polo tanto, afonda no compromiso do Goberno galego por desestacionalizar a demanda turística e diversificar os fluxos e repartir os beneficios do turismo polo territorio.

Escenarios ao volante vén precedido dun importante traballo de campo, visitando un gran número de lugares para valoralos de cara á súa selección final. Así mesmo, se promoveu a participación dos concellos, aos que se lles pediron datos actualizados sobre os miradoiros, así como a incorporación daqueles puntos de observación que consideraban de interese.

 

No proceso final, tamén se contou coa asistencia técnica da Fundación Galicia Sustentable e o apoio cartográfico do Instituto de Estudos do Territorio. O resultado é unha publicación que pretende recoller os itinerarios con maior interese paisaxístico e aqueles miradoiros que ofrecen os mellores puntos de observación. A escolla destes 50 miradoiros foi un proceso complexo no que se tivo en conta a súa accesibilidade e posta en valor previa, para o que foi preciso analizar máis de 400 puntos de interese repartidos por toda a Comunidade.

 

Rías, cantís, cabos, bosques, vales e montañas, o mosaico agro-gandeiro, os ríos Miño e Sil e espazos naturais de singular beleza como O Courel, Os Ancares, o Macizo Central ourensán ou Pena Trevinca inclúense en Escenarios ao volante. A guía, dispoñible en galego, castelán e inglés e que conta cun mapa adicional, está deseñada para desfrutar sen presas, o que posibilitará que cada viaxeiro descubra os seus propios itinerarios.