O turismo da Comunidade galega está presentedesde hoxe na feira de turismo FREE, que se celebra na cidade de Munich ata o próximo día 25 de febreiro, onde Turismo de Galicia presentar a oferta turística galega para o ano 2018, dentro do segundo mercado internacional máis importante e o terceiro que máis peregrinos achegou ao Camiño de Santiago logo de España e Italia.

FREE é a feira de turismo con maior repercusión na rexión de Baviera, o estado federado máis grande de Alemaña. É un certame xenérico de turismo, aínda que tamén con pavillóns temáticos dedicados a Caravaning, Camping, Bicicleta, Outdoor, Saúde e Benestar, deportes acuáticos, con diferentes activades nas que os visitantes poden participar.

A nosa Comunidade esperta moito interese entre os visitantes que buscan novas ideas para as súas vacacións ou ben para informarse de primeira man cando xa teñen decidido un destino. Trátase dun público con cultura viaxeira e bo coñecedor de Galicia, especialmente polo Camiño de Santiago.

Así, unha boa parte das persoas que se achegaron ao recinto galego nas últimas edicións desta feira estaba moi familiarizado co destino Galicia e contaba con moitas referencias da oferta turística galega. O público alemán que visita este certame adoita visitar a Comunidade galega en autocaravana ou vehículo propio.

Demanda turística

Con algo máis de 160.000 viaxeiros aloxados e máis de 260.000 noites nos establecementos regrados de Galicia, o mercado alemán representou en 2017 o 10,5% do total internacional. O alemán foi o segundo mercado en orde de importancia detrás de Portugal. Por outra parte, o pasado ano, a demanda turística alemá presentou un incremento no número de pernoitas do 5,6% en relación ao mesmo período do ano 2016. O turismo alemán cara a Galicia acumula cinco anos consecutivos de incremento da demanda no territorio galego.

 

Ademais, o ano pasado, 23.257 peregrinos alemáns realizaron o Camiño de Santiago e recibiron a Compostela, o que supuxo un 9,5% máis que no ano 2016. Alemaña foi o terceiro país que máis peregrinos achegou ao Camiño de Santiago en 2017 logo de España e Italia cunha porcentaxe do 7,7% sobre o total.