Galicia lidera o crecemento de viaxeiros na oferta regrada a nivel estatal co 8,4%
A cifra de viaxeiros aloxados nos establecementos regrados subiu no mes de xullo un 8,4% a respecto do mesmo mes de 2012.
No mes de xullo rexistráronse 518.814 viaxeiros que efectuaron 1.238.682 pernoitas, un 2,7% máis que as rexistradas no mesmo período do ano pasado.
Entre xaneiro e xullo deste ano, en Galicia subiron os viaxeiros a respecto do mesmo período de 2012 un 2,7%
Galicia lidera o crecemento do volume de viaxeiros a nivel estatal. A cifra de viaxeiros aloxados nos establecementos de aloxamento regrado de Galicia subiu un 8,4% neste mes de xullo a respecto do mesmo mes de 2012, con preto de 520.000 viaxeiros.
A cifra de pernoitas neste mesmo período -con 1.238.682- subiu tamén nun 2,7% a respecto das rexistradas no mesmo mes do ano pasado. Por primeira vez dende o ano 2006, exceptuando o ano Xacobeo, Galicia mellora as súas cifras de demanda turística neste mes de xullo.
O incremento da demanda prodúcese como consecuencia do bo comportamento experimentado tanto polo mercado nacional, que medra un 1,8%, coma polo internacional, o cal supera nun 11,6% a cifra de viaxeiros e nun 7,4% o nivel de pernoctacións de xullo do 2012.
O turismo internacional acada un máximo de viaxeiros en xullo, con algo máis de 121.000 no conxunto da comunidade, así como de peso na estrutura da demanda ao supoñer o 23,4% do total dos viaxeiros de aloxamento regrado.
Acumulado xaneiro-xullo 2013
Nos primeiros sete meses deste ano 2013 Galicia rexistra un incremento do volume de viaxeiros aloxados do 2,7% ata situarse preto do 2 millóns de viaxeiros e máis de 4 millóns de pernoitas.
O incremento da demanda prodúcese por unha mellora importante do turismo internacional, que acumula un crecemento do 13% nos viaxeiros e do 8,9% nas pernoitas. Isto supón que o mercado internacional acada cotas nunca antes coñecidas representando o 25% do total de viaxeiros aloxados e o 21,3% das pernoitas nos primeiros sete meses deste ano 2013.
