A Fraga de Catasós, nos arredores da vila de Lalín -a medio camiño entre Santiago e Ourense-, esconde carballos e castiñeiros centenarios. Cantos coidados e aloumiños para que desen os seus froitos! As castañas serviron de sustento nos longos meses de inverno de outrora e coa madeira dos seus estilizados troncos fabricáronse as vigas dos pazos destas terras do Deza.
Protexidos baixo a figura de Monumento Natural, agora medran fachendosos cara ao ceo e pasan por ser dos exemplares máis altos de Europa. Un curto paseo alfombrado de follasca levaranos a coñecer os recunchos íntimos desta fraga, reduto do bosque caducifolio que outrora cubría boa parte da xeografía galega.
Punto de inicio | Tipo de ruta | Km | Duración estimada | Dificultade en progresión | Dificultade en orientación |
Quintela (Lalín) | Circular | 1,2 | 1 h. | Baixa | Baixa |
PERFIL: Todos os públicos |
O paseo a través da Fraga de Catasós é sinxelo e está moi ben sinalizado. Os diferentes paneis informativos faranvos a visita moito máis enriquecedora, posto que vos facilitarán información máis que suficiente para comprender o interese desta fraga, modesta na súa extensión, pero intensa en canto forza e beleza do seu arboredo.