Relaxarémonos nas augas mineiromedicinais dos balnearios, faremos un percorrido en catamarán polo Miño, coñeceremos adegas e mosteiros e chegaremos ao barrio xudeu de Ribadavia.

As adegas que se propoñen neste itinerario son un exemplo das moitas que podedes atopar ao longo e ancho do territorio que forma a Denominación de Orixe, dende as modernas e grandes como a da Cooperativa do Ribeiro ás máis pequenas, de colleiteiro, cun trato máis familiar e próximo.

O Ribeiro é a comarca produtora de viño máis ancestral de Galicia. Os ríos Miño, Arnoia, Avia e Barbantiño conflúen nela, deixando ao seu paso unha frondosa vexetación de ribeira intercalada con viñedos e hortas. Nas súas ladeiras disemínanse igrexas, mosteiros, pazos, castros e xuderías, así como fontes termais, que resucitan nunha nova idade de ouro para os seus balnearios.

Máis información...
- Adega Pazo de Casanova. www.pazocasanova.com
- Adega Viña Meín. www.vinamein.com
- Balneario da Arnoia. Teléfono: 988 492 400
- Balneario de Cortegada. Teléfono: 988 483 276

Día 1º

A Arnoia ábrenos as portas á comarca vitivinícola máis antiga de Galicia

A Arnoia será o lugar elixido como punto de partida para introducirnos na comarca vitivinícola máis antiga de Galicia, O Ribeiro. Neste concello, situado na marxe do encoro de Frieira, dáse o paradigma da harmonía entre viño, auga e termalismo que atoparemos noutros lugares da comarca.

Lembra que pode haber recursos que non estean xeorreferenciados e, polo tanto, non os esteas visualizando.

O Balneario da Arnoia

A localidade conta na súa oferta de aloxamento cun establecemento hoteleiro con encanto rehabilitado sobre un antigo priorado cisterciense. Tamén existe un moderno hotel que alberga un balneario de augas hipotermais; emanan a 22 graos e a súa composición sulfurada e fluorada é a axeitada para combater afeccións reumáticas, dermatolóxicas ou respiratorias.

Recomendámosvos chegar cedo pola tarde se queredes aproveitala relaxadamente neste balneario, que se aterraza nunha ladeira en pendente, tal como fan aquí os viñedos. Dende o seu enclave privilexiado mira cara ás augas encoradas e aos bosques da ribeira do Miño. É a mesma paisaxe que veremos dende as súas piscinas exteriores e interiores.

Percorrido en catamarán polo río Miño

Se o tempo é propicio, pola tarde podemos completar a balneoterapia cun percorrido en catamarán polo río Miño. Practicamente aos pés do balneario atópase o embarcadoiro de madeira. A travesía discorre por estas augas tranquilas durante máis dunha hora, acompañados en todo momento de viñedos e de carballos, salgueiros, ameneiros ou bidueiros. Segundo a época do ano tinguiranse de verdes, marróns, vermellos ou amarelos.

Chegaremos a outra poboación termal, a de Cortegada, cuxo balneario vemos exhibirse maxestoso na marxe do río, arroupado polo bosque ás súas costas. Se non é primavera ou verán aconsellámosvos concertar a viaxe coa empresa organizadora con anterioridade. No balneario poderán axudarvos a contactar con ela ou xestionalo directamente.

Os típicos pementos da Arnoia preséntanse de maneiras moi diversas, mesmo en xeado

Á hora de cear, para acompañar a un viño ribeiro podemos pedir produtos tradicionais, e, se estamos en temporada, gozar tamén dun dos manxares estrela da comarca: os recoñecidos pementos da Arnoia. Están exquisitos fritos, recheos ou en tortilla. Mesmo se serve xeado de pementos. En agosto celébrase a festa de exaltación do produto, declarada de interese turístico.

Día 2º

De ruta polas adegas, admirando a monumentalidade do territorio e o barrio xudeu de Ribadavia

A Adega Pazo de Casanova

Pola mañá, tralo almorzo, dirixímonos á poboación de Santa Cruz de Arrabaldo, preto da cidade de Ourense. Visitaremos a Pazo de Casanova, a media hora de camiño pola A-52, a N-120 e a estrada provincial OU-0522. Despois de franquear as murallas de pedra do pazo rural do século XVIII pertencente á adega, nas ladeiras do terreo veremos as vides de treixadura, albariño, godello e loureira, ao longo dunha extensión de dez hectáreas que miran cara a poñente.

Lembra que pode haber recursos que non estean xeorreferenciados e, polo tanto, non os esteas visualizando.

Durante o percorrido explicarannos o proceso tradicional de elaboración que segue a adega. E coñeceremos os proxectos de investigación nos que están inmersos para contribuír ao desenvolvemento e evolución dos viños da zona, en colaboración coa Estación de Viticultura e Enoloxía de Galicia. Ao rematar degustaremos os seus viños e augardentes.

A Adega Viña Meín

Trala toma de contacto coa primeira adega suxerímosvos que poñades rumbo ao concello de Leiro, no curso medio do río Avia, de camiño entre Ribadavia e O Carballiño. Na parroquia de San Clodio do Ribeiro atópase a adega Viña Meín, que poderemos visitar e degustar os seus caldos.

Rodeada por unha plantación de treixadura, o vello e gran casal é hoxe un coqueto aloxamento de turismo rural, pioneiro do enoturismo en Galicia, dende o que podemos ver ascender os viñedos pola ladeira. A adega, de nova construción, está levantada aos pés do edificio destinado aos hóspedes, aproveitando as pedras orixinais da adega antiga.

O mosteiro cisterciense de San Clodio

Apenas a un quilómetro de aquí atópase o Mosteiro de San Clodio, Monumento Histórico-Artístico dende 1931 e considerado o berce dos viños do Ribeiro. Os monxes cistercienses ocupárono no século XII e o seu labor impulsou o cultivo da vide neste territorio. A terra, as suaves ladeiras e a orientación ao mediodía e ao oeste fixeron o resto do traballo. Hoxe alberga un hotel-monumento. Podemos acceder libremente ao seu interior e pasear polos seu xardíns ou visitar os claustros. Na súa igrexa sobresae o retablo e o curioso artesoado mudéxar baixo o coro.

Carne, viño e licor café

De volta, no restaurante do hotel teremos a oportunidade de degustar carne ao barro ou año, ou elixir outros establecementos da parroquia con menús baseados na cociña tradicional e regados cos viños da zona. Na sobremesa é típico pedir unha copiña de licor café, tan popular en toda a provincia de Ourense.

Ao rematar podemos dar un paseo ata a ponte medieval de San Clodio, que, xunto co mosteiro, completa o conxunto histórico-artístico. Reparade na cruz que coroa o seu arco central. Na parede externa hai unha figura dun santo que podería ser San Clodio.

O barrio xudeu de Ribadavia

O resto da tarde dedicarémolo a pasear por Ribadavia, a capital do Ribeiro, onde se celebra, a finais de abril ou principios de maio, a Feira do Viño do Ribeiro, a máis antiga de Galicia e de Interese Turístico. O viño tamén trouxo a esta vila a unha importante comunidade hebrea, que chegou a ser a metade da súa poboación.

Podemos entrar ao barrio xudeu, entre a Praza Maior e a muralla. Entre as súas tendas destaca unha que prepara exquisitos doces hebreos seguindo antigas receitas. A Casa da Inquisición é un fermoso edificio do século XVI, que distinguiredes porque na fachada labráronse cinco escudos das familias ligadas ao Santo Oficio, chegado á vila para vixiar e axustizar aos falsos conversos xudeus.

Unha visita ás ruínas do Castelo dos Condes de Ribadavia

As ruínas do castelo dos Condes de Ribadavia, na parte alta desta poboación, son a icona da vila. Abandonado dende o século XVII, aínda se percibe a grandeza de ter sido unha das maiores fortalezas medievais de Galicia. Convidámosvos a atravesar as tres portas da muralla que se conservan: a Porta de Cerca Oeste, fronte á Alameda; a Porta de Celanova, ao sur, comunicando co río; e a Porta Falsa, ao sueste, camiño ao muíño. No miradoiro da Praza Buján poderedes descansar do paseo vendo discorrer o río Avia, que máis adiante entrega as súas augas ao Miño.

Ribadavia conta con multitude de bares cunha rica selección de viños, ademais dos propios da Denominación de Orixe Ribeiro. Son uhna excelente opción para ir de tapas e cear. Algún destes establecementos ofrece pola noite espectáculos de música en directo de grupos locais.

 

Día 3º

Un tratamento no Balneario da Arnoia ou un paseo en barca

Tralo almorzo animámosvos a seguir aproveitando as propiedades mineiromedicinais do balneario de A Arnoia, onde poderedes recibir unha masaxe o un tratamento de estética, saúde ou relax.

Lembra que pode haber recursos que non estean xeorreferenciados e, polo tanto, non os esteas visualizando.

Se o preferides, podedes baixar ata o embarcadoiro, alugar unha pequena barca de remos e navegar por estas augas mansas. Outra alternativa é pasear pola marxe e contemplar a paisaxe, ou tomar algo no seu pequeno e rústico bar rodeado de xardíns e con mesas de madeira.

Xunta de Galicia

© 2016 Turismo de Galicia | Todos os dereitos reservados
Política de privacidade | Contacto | Accesibilidade

Galicia
Arriba