O xeodestino confórmano os concellos da Cañiza, A Guarda, Arbo, As Neves, Baiona, Covelo, Crecente, Fornelos de Montes, Gondomar, Mondariz, Mondariz-Balneario, Mos, Nigrán, O Porriño, O Rosal, Oia, Pazos de Borbén, Ponteareas, Redondela, Salceda de Caselas, Salvaterra de Miño, Soutomaior, Tomiño, Tui e Vigo.

Samil, O Vao, Patos, Praia América... A marxe sur da ría de Vigo é unha sucesión de grandes praias de area dourada e de recolectos portos como Canido ou Panxón. E gardando a entrada da ría, fronte á moderna e emprendedora cidade de Vigo, o paraíso das Illas Cíes.

Baiona foi o primeiro porto de Europa que recibiu a noticia do Descubrimento de América, o que se celebra por todo o alto na "Festa da Arribada". Co seu animado centro histórico, a súa marabillosa baía e os seus clubs náuticos, aquí as vacacións desfrútanse durante todo o ano.

Situada na fronteira con Portugal e en medio dunha espléndida paisaxe natural na beira do Miño, Tui é unha cidade monumental erixida torno a unha catedral amurallada. Moi preto, o parque natural do Monte Aloia.

Terra dentro non hai que esquecer Mondariz, vila termal por excelencia, cun espléndido balneario e campo de golf. Ademais, O Rosal, un fértil va de kiwis, flores e viñedos da D.O. Rías Baixas. E A Guarda, famosa pola súa lagosta e polo impoñente castro do Monte Tegra.

Patrimonio

Tres núcleos de poboación deixan a súa pegada neste territorio. Vigo, a gran urbe galega, co mercado da Pedra onde degustar as afamadas ostras ou as vistas desde o Monte do Castro entre todos os atractivos que ofrece esta cidade cosmopolita. Baiona, centro turístico con tranquilas praias, portos deportivos e parador de turismo. E Tui, coa súa catedral convertida en fortaleza e o labirinto das súas rúas medievais. Tamén é de xustiza sinalar dous grandes castelos, o de Soutomaior e o de Vilasobroso (Ponteareas), cargados de historia.

Lembra que pode haber recursos que non estean xeorreferenciados e, polo tanto, non os esteas visualizando.

Entre os Bens de Interese Cultural deste xeodestino fai falta destacar elementos da arte rupestre e prehistórica como os gravados do Castro de Santa Tegra, o xacemento paleolítico das Gándaras de Budiño no Porriño; elementos da arquitectura civil como o Pazo de Cadaval en Nigrán ou os conxuntos históricos da cidade de Tui e da de Baiona; elementos da arquitectura relixiosa como o convento de Santa María de Oia ou o convento de San Domingos de Tui, ou da arquitectura fortificada como o castelo de Soutomaior ou o recinto amurallado de Salvaterra de Miño.

Espazos naturais

Todo o suroeste da provincia de Pontevedra define un xeodestino conformado por tres elementos: unha liña de costa, un río fronteirizo e varios agrupamentos de montañas no interior.

Lembra que pode haber recursos que non estean xeorreferenciados e, polo tanto, non os esteas visualizando.

A liña de costa ten, á súa vez, dúas partes. A primeira, acomodada, tranquila, baixa, repousada; é o interior da ría de Vigo desde a histórica ponte de Soutomaior ata deixar atrás a enseada de Baiona coas Illas Estelas (Rede Natura). A segunda, cando de súpeto vira cara ao sur, abrupta, moi batida polo Atlántico, con portos minúsculos excepto o da Guarda, ao pé do monte Santa Tegra e o seu poboado castrexo.

O río é o Miño na súa parte final, Lugar de Importancia Comunitaria, que une Galicia con Portugal e que morre nun esteiro ancho e espectacular, tras deixar atrás localidades históricas e fortificadas como Salvaterra de Miño e Tui, así como unha franxa de viñedos dentro da Denominación de Orixe Rías Baixas. Tamén o río Tea e o esteiro do río Miñor na Ramallosa xunto coa enseada de San Simón, son augas dentro da Rede Natura.

E os montes marcan o territorio dunha e doutro. De escasa altura e vellos, algún como o Aloia foi declarado Parque Natural. A serra da Groba pasa por ser unha das máis salvaxes da provincia.

 

Festas e gastronomía

No capítulo de festas de Interese Turístico de Galicia pide ocupar o seu lugar a da Ostra en Arcade, pertencente ao concello de Soutomaior e en Arbo celébrase a Festa da Lamprea. Hai que destacar o Corpus Christi de Ponteareas, que desde 2009 ten a declaración de Festa de Interese Turístico Internacional. Tamén se recoñece o Corpus Christi de Redondela pero neste caso como Festa de Interese Turístico de Galicia.
 
Na Cañiza celébrase a Romaría da Virxe da Franqueira. No xeodestino Ría de Vigo e Baixo Miño hai tamén unha festa que conta coa declaración de Festa de Interese Turístico Nacional: a Festa da Arribada da Carabela Pinta de Baiona.

DESTACADO: A mellor praia do mundo

O areal de Rodas é, segundo o diario The Guardian, a mellor praia do mundo. Integradas no Parque Nacional das Illas Atlánticas -que comprende Cíes, Ons, Sálvora e Cortegada-, as Illas Cíes son o paraíso de augas turquesa e area branca da costa galega. O acceso ás illas está limitado a 2.200 persoas ao día e existen carreiros que conducen a cada un dos seus tres faros. Están comunicadas por un servizo regular de transporte marítimo de pasaxeiros desde os portos de Vigo, Baiona e Cangas.

Nas Cíes habita a colonia máis grande do mundo de gaivotas patiamarillas e a zona submarina que rodea as illas constitúe un dos ecosistemas máis ricos da costa de Galicia, destacando o seu frondoso bosque de algas pardas. 

Xunta de Galicia

© 2016 Turismo de Galicia | Todos os dereitos reservados
Política de privacidade | Contacto | Accesibilidade

Galicia
Arriba