Igrexa de estilo barroco, de tipoloxía rural moi difundida pola bisbarra. Na súa planta rectangular desenvólvese unha soa nave. A construción é sinxela, concentrando a decoración na fachada principal, no eixe vertical central da cal se superpoñen unha porta de entrada, unha ventá e, rompendo a cornixa, unha espadaña de dous corpos, o primeiro con tres machóns e campás, o segundo ornamental rematado en pináculos. Cuberta a dúas augas con cubrición de tella curva.