Edificio proxectado por Lucas Ferro Caaveiro e realizado entre os anos 1754-1765. Tamén chamada das Angustias de Abaixo. Posúe unha planta non moi común que tende a ser central, presidida por unha grande cúpula de media laranxa que organiza o espazo interior. Aquí destaca o retablo maior, que xunto aos colaterais, se realizan e engaden despois de rematado o edificio. Pero o mais destacable é a fachada principal, repleta de simbolismos. É un grande pano que se desenvolve na vertical. Sobre a porta principal colócase unha fornela coa figura da Piedade; máis arriba debúxase o escudo de España, culminando, en último lugar, con catro esculturas que aluden ás Virtudes: a Prudencia, a Xustiza, a Fortaleza e a Temperanza, que encadran o campanario central.