FILANDÓN DE MÚSICAS DO COUREL

Festas de interese turístico
1249
Datas de celebración: 06/08 - 06/08

Localización

Parroquia: Seoane do Courel (San Xoán)

Lugar: Seoane do Courel

Folgoso do Courel - Lugo

Coordenadas:
42º 38' 11.0" N - 7º 09' 05.0" W

Descrición

A riqueza musical do Courel recobra vida, ano tras ano, o segundo domingo de agosto nun escenario único no que se citan os tocadores do corno celta, os vellos romances, as cantigas da seitura e outros labores, os brindeiros de voda, gaiteiros e músicos que albergan antiquísimas tradicións.
Ao carón da bicentenaria Ferrería de Seoane, homes e mulleres de todas as idades, moitos deles espontáneos, cantan “a capella” ou interpretan pezas da máis antiga tradición con gaitas, tamborís, tambores, bombos, pandeiretas e algúns singulares instrumentos de percusión que aínda se conservan nestas terras.
Centenares de persoas acoden á explanada da ferraría e gozan das actuacións de músicos, poetas, brindeiros e regueifeiros da comarca e doutras partes de Galicia. Unha exposición de instrumentos tradicionais, discografía e bibliografía popular xunto coa degustación de pan de trigo de Noceda e dos exquisitos freixós con mel das colmeas do Courel, entre outros produtos da terra, poñen a guinda a esta festa que naceu por iniciativa do musicólogo Xosé Lois Foxo para recuperar o inxente patrimonio musical do Courel.
A singular manifestación da memoria viva do Courel comeza coa posta en marcha do mazo centenario e dos foles da ferraría, unha das máis importantes instalacións industriais e arquitectónicas deste tipo que se conservan no Occidente europeo, convertida nun auténtico museo etnográfico. Logo, ten lugar a chamada ao Filandón (o nome procede do antigo labor de fiar o liño que se realizaba en veladas festeiras) facendo uso do corno celta, como antigamente se reunía os veciños. 

Destacado:
Visita ao interior da bicentenaria Ferrería de Seoane.
 

Outras características

Folclóricas
Festas Festas de interese turístico Festas de Galicia de interese turístico
Arriba
Axúdanos a mellorar!