Convento de clausura da orde das Clarisas. Fundado en 1260 con doazóns populares e o dote de Dna. Violante de Castilla, esposa do rei Alfonso X o Sabio, agrándase no s. XVI coas doazóns de Dna. Isabel de Granada, neta de Boabdil e abadesa do convento. O edificio actual constrúese entre os ss. XVII e XVIII, traballando nel Domingo de Andrade, fray Gabriel Domínguez e Simón Rodríguez. Este último realiza a fachada-pano que dá paso ao patio interior que comunica coa igrexa. Realizada en cadeirado de granito, estrutúrase en tres rúas; é de grande dinamismo debido ao xogo de luces e sombras provocado pola profusa decoración centrada na rúa central e os seus tres corpos: grandes cornixas, frontóns partidos, placas, volutas e, rematando, os grandes cilindros que dan sensación de inestabilidade.