Turismo de Galicia

A natureza, é o noso ben máis prezado e coidala, responsabilidade de todos.

Écociña é un proxecto innovador dirixido á hostalería do Camiño, cuxo principal valor céntrase na mellora da oferta gastronómica, introducindo produtos de proximidade, para conseguir unha oferta diferenciada, diversa e de calidade e a implantación de prácticas sostibles na xestión e explotación dos establecementos hostaleiros.

Galicia ten ao longo dos camiños de Santiago, excelentes produtos agrícolas, gandeiros e pesqueiros. Se os restaurantes os incorporan ás súas cartas conseguirán unha oferta culinaria diferenciada, diversa e de calidade; algo que xa demanda o peregrino, que busca unha experiencia de calidade que vai máis aló dunha degustación gastronómica; busca ademais establecementos que empaticen cunha filosofía de traballo onde a protección social, cultural e ambiental sexa a razón da súa actividade. 

É preciso que apostemos pola sostibilidade e a incorporación dos magníficos produtos de Galicia á restauración do Camiño de Santiago. 

Co programa ÉCociña realizouse un mapeo da biodiversidade animal e vexetal en cada unha das rutas do Camiño, e un rastrexo de restaurantes do Camiño que xa practican a sostibilidade nos seus negocios.

Seguindo os Obxectivos de Desenvolvemento Sostible da Axenda 2030 da ONU, deseñouse unha enquisa que analiza a sostibilidade de cada establecemento, identificando as súas boas prácticas e a posible marxe de mellora; para así propoñer accións que axuden a alcanzar os obxectivos do programa. 

Écociña é un programa que quere sensibilizar ao conxunto da hostalería, divulgando os exemplos de boas prácticas no Camiño e convidando a outros establecementos a que se inscriban ao programa e adquiran o compromiso da sostibilidade. 

Proxectamos as boas prácticas na restauración, de forma que o usuario poida identificar estes casos de éxito e acceda no Camiño a unha oferta comprometida, onde vivir unha experiencia única. 

Buscamos axuntar sostibilidade con calidade culinaria. 

Xuntos conseguiremos unha hostalería diferenciada e de calidade; xuntos sentaremos as bases dunha hostalería comprometida co medioambiente. Para que os nosos usuarios, cada vez máis esixentes, nos identifiquen e nos elixan como referente.