Turismo de Galicia organiza en colaboración co Instituto Cervantes de Toquio un ciclo de cinema galego no que se proxectarán seis filmes entre os días 5 de outubro e 20 de decembro.

 

O ciclo, incluído nas accións que se desenvolven no marco da conmemoración do Ano Dual España-Xapón, ten por obxectivo ofrecer aos espectadores xaponeses unha visión da paisaxe e da cultura material e inmaterial de Galicia e do seu carácter.

 

Seleccionáronse para este ciclo as seguintes seis películas: 'Mar adentro', 'La lengua de las mariposas', 'The Way', 'Romasanta', 'A caza da bestia'; '18 comidas' e 'O Apóstolo'. Todas elas con forte implicación da paisaxe na súa narración. En todos os filmes aparecen fitos recoñecibles e propios da paisaxística que reforzan a autenticidade do territorio, tal é o caso do casco antigo de Ourense, da aldea de Seceda, dos soutos da Fonsagrada; da praia das Furnas; as prazas circundantes á catedral de Santiago; o mercado de Compostela; etc. Doutra parte, son películas cun alto contido emocional que facilita a identificación dos espectadores cos personaxes e os escenarios.

 

O ciclo contará con dúas sesións de cine fórum impartidas por un profesor do Instituto Cervantes para os xaponeses teñan maior coñecemento da historia e o contexto cultural que teñen as películas do ciclo.

 

Ademais, crearase un espazo de web onde se poderán coñecer as localizacións das rodaxes cinematográficas (Movie Map), as anécdotas das rodaxes e a información turística dos escenarios de cada película en castelán e en xaponés.