06 mar 2014

Turismo de Galicia concede axudas a 16 empresas turísticas galegas que estrean distintivo Q de Calidade Turística

Un total de 115 negocios e centros de hostalería, restauración e ocio da comunidade obtiveron axudas da Administración Turística galega para a obtención ou mantemento desta certificación que outorga o Instituto para a Calidade Turística Española (ICTE).


Ademais dos 16 novos Q de Calidade, un total de 99 empresas turísticas recibiron axudas para a renovación e seguimento das correspondentes normas UNE para o mantemento da marca Q de Calidade Turística
Galicia conta con 249 empresas distinguidas con esta certificación, sendo a segunda comunidade do Estado con máis distintivos e liderando segmentos como o turismo rural, termal, lecer nocturno, turismo activo, estacións náuticas e turismo industrial.


O Plan Integral de Turismo de Galicia inclúe unha liña estratéxica con accións dirixidas á mellora na xestión e na innovación do sector que implica a implantación de sistemas de xestión como aposta clara para aumentar o grao de competitividade do sector turístico

Dezaseis empresas do sector turístico galego veñen de incorporarse á listaxe de empresas distinguidas coa certificación de Q de Calidade Turística, para o que contaron co apoio da Xunta a través de Turismo de Galicia. Ademais, 99 empresas turísticas recibiron axudas para o seguimento ou renovación da marca Q de Calidade Turística.

Estes establecementos recibiron axudas do Executivo galego a través da liña de subvencións posta en marcha polo departamento turístico para a certificación, seguimento e renovación da marca Q de Calidade Turística. En total, 115 establecementos galegos de turismo rural, establecementos hoteleiros, apartamentos e vivendas turísticas, campamentos de turismo, axencias de viaxes, cafetarías, bares, restaurantes e empresas de servizos turísticos complementarios obtiveron axudas nos procesos de certificación, seguimento e renovación das correspondentes normas UNE co obxecto da obtención ou mantemento da marca Q de Calidade Turística do Instituto para a Calidade Turística Española.

Galicia conta no balance de 2013 con 249 empresas con esta certificación, o que a sitúa no segundo lugar do Estado en canto a comunidades con máis distintivos e líder nos segmentos de turismo rural, termal, de lecer nocturno, de turismo activo, estacións náutico-deportivas e turismo industrial. Así, Galicia conta con 50 establecementos hostaleiros con este distintivo, 58 establecementos rurais, 8 balnearios, 2 cámpings, 2 palacios de congresos, 8 praias, 51 servizos de restauración, 40 axencias de viaxes, 6 empresas de turismo activo, 2 campos de golf, 9 instalacións náutico-deportivas, 11 adegas e 2 establecementos de lecer nocturno.

O Plan Integral de Turismo de Galicia inclúe entre as súas liñas estratéxicas unha liña orientada ao fomento do talento e ao aproveitamento das novas tecnoloxías para acadar un sector competitivo e un destino intelixente. Nesa liña encádrase unha acción dirixida á mellora na xestión e na innovación do sector que implica a implantación de sistemas de xestión como aposta clara para aumentar o grao de competitividade do sector turístico. Por este motivo, proponse o apoio á implantación de distintos sistemas de xestión que avalen un sistema turístico de calidade.

Arriba
Axúdanos a mellorar!