Turismo de Galicia concedeu, a través da orde de subvencións dirixida aos Municipios Turísticos da Comunidade, axudas a concellos que contan con esta declaración para a contratación de persoal que reforce o servizo das oficinas de información turística. Un total de 35 Municipios Turísticos das catro provincias galegas contarán con este servizo a maiores grazas á orde de axudas de Turismo de Galicia dotada con 175.000 euros.

Así, 43 traballadores serán contratados durante os meses de maior afluencia turística para mellorar o servizo de información que se ofrece nos municipios e para reforzar a imaxe turística dos mesmos así como da comunidade.

A Lei 7/2011, do 27 de outubro, do turismo de Galicia establece que os municipios turísticos e os suxeitos que prestan neles servizos deben ser obxecto de atención preferente no tocante á elaboración de plans e programas turísticos das administracións supramunicipais e autonómica; no relacionado coas liñas e medidas de fomento económico establecidas pola Xunta de Galicia e as deputacións provincias; nas actividades dirixidas á promoción interior e exterior do turismo e ao fomento da imaxe de Galicia como marca turística global e ás políticas de implantación ou mellora de infraestruturas e servizos que inciden no turismo.

Os Municipios Turísticos no Plan Integral de Turismo
O Plan Integral de Turismo de Galicia recolle na liña estratéxica 6, orientada a promover o consenso e a cooperación entre o sector público e privado para un marco eficiente e xerador de oportunidades, unha acción destinada a impulsar o desenvolvemento dos destinos a través da creación dunha rede de técnicos de Municipios Turísticos para o fortalecemento dos municipios como destinos turísticos.

Así, nesta acción inclúense medidas como o deseño dunha estratexia para a dinamización dos municipios turísticos con vocación sostible e enfocada á creación de destinos intelixentes; o desenvolvemento de campañas promocionais dos municipios de cara á desestacionalización; o establecemento dun Sistema Estandarizado de Recollida de Información para Estudos de Mercado turísticos, a través de enquisas a visitantes e empresas do sector turístico dos municipios así coma o seguimento de indicadores clave.

Ao tempo, promóvese dentro das actuacións desta acción do Plan Integral de Turismo de Galicia o apoio á creación e promoción de novos produtos turísticos nos municipios; o apoio á implantación dun Plan de Formación e Reciclaxe Profesional para axentes turísticos públicos e privados dos municipios, a implantación dun Plan de Estandarización dos procesos de Promoción e Información Turística nos municipios; o impulso da creación ou fusión de entidades xestoras para os territorios turisticamente homoxéneos ou o apoio para o deseño de plans estratéxicos por xeodestino que establezan a estratexia turística do territorio co obxecto de crear unha oferta diferenciada en cada xeodestino de fácil identificación.