Turismo de Galicia investirá un total de 4,5 millóns de euros na nova campaña de promoción do destino que se materializará en 2014 e que persegue a difusión e promoción dos recursos turísticos da comunidade a través de diversas accións de comunicación en diferentes soportes.

A campaña promocional de Turismo de Galicia incidirá na promoción activa dos valores turísticos da comunidade a través de diferentes actuacións e terá alcance local e nacional para incidir no turismo de proximidade e tamén para captar viaxeiros en períodos vacacionais, interesados no Camiño de Santiago ou en realizar estadías, tanto na época estival como en fins de semana ou pontes.

Dende mediados deste ano ata mediados de 2015 Galicia acollerá os actos conmemorativos do VIII Centenario da Peregrinación de San Francisco de Asís a Santiago, que converterán á comunidade no epicentro do turismo cultural e en sede de diversos encontros, congresos, exposicións ou actividades musicais, supoñendo un dos atractivos e potenciadores turísticos fundamentais para a comunidade galega neste período.

O turismo supón para Galicia preto do 11% do Produto Interior Bruto. Galicia é a comunidade que mais aposta polo sector. A Xunta de Galicia, a través de Turismo de Galicia ten a competencia de impulsar, promocionar e ordenar o turismo dentro da comunidade. De igual modo, encárgase de conservar e promocionar os Camiños de Santiago. Entre as funcións de turismo de Galicia inclúese o aproveitamento e potenciación dos recursos turísticos de Galicia mediante a promoción, publicidade, relacións públicas e outras accións de notoriedade, tanto no interior de Galicia coma no resto de España e no exterior.

Éxito da campaña ‘Galicia, o bo camiño’
A comezos do verán Turismo de Galicia puxo en marcha a campaña Galicia, o bo camiño, que chegou nos primeiros quince días a máis de 7’5 millóns de persoas a través das redes sociais. A páxina de Turismo de Galicia acadou máis de 11 mil novos fans e o vídeo promocional xerou máis de cinco mil comentarios e foi compartido máis de vinte mil veces nese período e reproducido 277.414 veces.

Boa parte dos usuarios visionaron a campaña de Turismo a través dos seus dispositivos móbiles, en total xeraron 4 millóns de impresións cun CTR do 4,69% e máis de 28 mil ‘me gusta’. Os usuarios que accederon á campaña a través do seu ordenador alcanzaron os 3.327.667 e a ratio de clickeo chega ao 2%. O spot promocional de Turismo de Galicia en galego xerou 428 mil impresións cunha ratio de clickeo do 4,6%. Un total de 3.110 usuarios clickaron en ‘me gusta’ no vídeo e rexistráronse nel 383 comentarios. O spot en galego foi compartido 2.907 veces e reproducido 11.822 veces.

Récord na cifra de viaxeiros aloxados
Galicia rexistrou en agosto o máximo histórico de viaxeiros aloxados nos establecementos regrados, superando incluso en algo máis de 1.000 aos computados no Ano Santo 2010. Porcentualmente, a suba é a máis elevada dos últimos once anos.

Galicia rexistrou no mes de agosto unha cifra de viaxeiros aloxados en establecementos regrados de 727.733, isto é, un 11,6% máis que os rexistrados no mesmo mes do ano pasado.

O mercado nacional medrou un 6,5% e o internacional un 8,4%, acadando o máximo de viaxeiros aloxados con case 160 mil no conxunto da comunidade e de pernoitas –superando as 300 mil- así como na estrutura da demanda en agosto supoñendo o 16,6% do total das pernoitas de aloxamento regrado.

No acumulado anual de xaneiro a agosto Galicia lidera o crecemento da cifra de viaxeiros aloxados en establecementos regrados. Tamén no que vai de ano o turismo internacional medrou un 12% na cifra de viaxeiros e un 8,4% na de pernoitas, acadando cotas do 24,1% do total de viaxeiros aloxados, nunca antes rexistradas. Este segmento supera por primeira vez a barreira dos 600 mil viaxeiros ata o mes de agosto.