03 xuñ 2019

A Xunta salienta un investimento de 4,3 millóns de euros que está a permitir o impulso do enoturismo en Galicia

 As actividades desenvolveranse do 7 ao 9 e do 14 ao 16 de xuño nas denominacións de orixe Rías Baixas, Ribeiro, Monterrei, Ribeira Sacra e Valdeorras

Este evento permitirá coñecer ata 67 adegas e ofrece un amplo abano de propostas como catas comentadas, visitas a museos ou rutas monumentais
 
Román Rodríguez avanzou a próxima posta en marcha dos plans de dinamización turística para os cinco territorios denominación de orixe
 
Pola súa banda, José González destacou que o eido do viño galego agrupa máis de 15000 viticultores e 400 adegas e lembrou que Medio Rural destinará no período 2019-2020 máis de sete millóns de euros en axudas para o sector
 
Presentación das VIII Xornadas de portas abertas nas rutas dos viños de Galicia.

O conselleiro de Cultura e Turismo, Román Rodríguez, e o conselleiro do Medio Rural, José González, participaron na presentación da VIII edición das Xornadas de Portas Abertas das Rutas dos Viños de Galicia nas denominacións de orixe Rías Baixas, Ribeiro, Monterrei, Ribeira Sacra e Valdeorras, un acto que permitiu poñer en valor o notable investimento, de 4,3 millóns de euros, que a Xunta está a facer para impulsar o enoturismo.

A iniciativa presentada permite ao visitante coñecer un total de 67 adegas, ás que poderá acceder de xeito gratuíto e guiado e nas que se ofrece un completo programa de actividades dispoñible na web das xornadas. Así, ademais das catas nestes establecementos e nos museos do viño, varios restaurantes de cada unha das zonas ofrecerán dous menús especiais para a ocasión que inclúen un primeiro e segundo prato, maridados ambos con viños da Denominación de Orixe correspondente, e sobremesa.

Igualmente, en cada ruta ofrecerase un programa especial de actividades para a fin de semana: catas comentadas, visitas a museos, rutas monumentais, paseos en barca, descontos en aloxamentos e outras accións relacionadas co mundo do viño.

As xornadas desenvolveranse do 7 ao 9 de xuño nas denominacións de orixe Rías Baixas e Ribeiro, e do 14 ao 16 nas de Monterrei, Ribeira Sacra e Valdeorras. Para facilitar os desprazamentos, a Xunta pon a disposición o Bus do Viño, que conectará diferentes cidades galegas coas denominacións de orixe, de xeito que os participantes poderán vivir a experiencia con total comodidade e despreocupación.

Sinalización das rutas

Román Rodríguez afirmou que as Xornadas de Portas Abertas das Rutas dos Viños “serán, un ano máis, unha excelente oportunidade para atraer turistas e tamén para que os propios galegos poidamos descubrir paisaxes e comarcas que aínda non coñecemos”. Ademais, destacou que este tipo de eventos “axuda a desestacionalizar e a diversificar a oferta por gran parte de Galicia, permitindo que os beneficios que xera o turismo cheguen a todo o territorio”.

O titular de Cultura e Turismo explicou que o apoio ao sector tradúcese nunha achega de 230.000 euros para a realización destas xornadas ata 2021, e noutros 236.000 euros destinados á sinalización das rutas das DO Rías Baixas e Ribeiro xa executadas. Nunha segunda fase acometerase a sinalización das DO Monterrei, Ribeira Sacra e Valdeorras. Ademais, Román Rodríguez fixo referencia á próxima posta en marcha dos plans de dinamización turística para as cinco zonas denominación de orixe, froito da colaboración de diversos departamentos da Xunta co obxectivo de impulsar economicamente estes territorios.

Cómpre destacar que a Xunta realizou importantes investimentos para a posta en marcha do Museo do Viño de Galicia en Ribadavia, o Museo da Enoloxía do Condado de Tea, o Spa Viñoterapia de Leiro ou para a conservación dos lagares rupestres de Oímbra, entre outras actuacións. Deste xeito, o Goberno galego fixo unha achega total para a dinamización do enoturismo de 4,3 millóns de euros, ao que se suma o apoio ás numerosas festas de interese turístico arredor deste produto.

No marco da presentación, Román Rodríguez tamén lembrou o impulso da Xunta á nova estratexia de turismo enogastronómico Galicia Sabe, “na que se recollen as principais liñas de actuación e as prioridades para promover un turismo sustentable baseado nos produtos autóctonos e de tempada, no valor das persoas e na paisaxe”, explicou.

O viño como elemento dinamizador

Pola súa banda, o conselleiro do Medio Rural, José González, puxo en valor o viño galego como “principal elemento dinamizador” dos territorios que compoñen as cinco denominacións de orixe vitivinícolas da nosa comunidade. Neste sentido, cualificou as rutas do viño como unha “oportunidade” para amosar o “orgullo que temos por todas estas denominacións de orixe”.

O titular de Medio Rural destacou que esta consellería destinará no período 2019-2020 máis de sete millóns de euros en axudas para o sector. Estes fondos servirán tanto para fomentar este eido produtivo como para impulsar a súa comercialización e promoción nos diferentes mercados.

José González salientou ademais que cada unha das DO galegas teñen a súa propia personalidade, malia que estean próximas xeograficamente, polo que invitou a todos os presentes a ser “coñecedores e usuarios” das devanditas rutas, coas que se está a promocionar o enoturismo en Galicia.

Así mesmo, o conselleiro salientou o peso do sector vinícola galego, que –explicou– agrupa máis de 15.000 viticultores e 400 adegas, cunha superficie que supera as 9.000 hectáreas de viñedos e cunha produción anual de máis de 60 millóns de quilos de uva producidos.

 
Arriba