Capela de planta rectangular con teitume a dúas augas, con moitas reformas ao longo dos séculos. Conta con perpiaños romanos, elementos románicos e algunha ampliación do século XVIII.

Lugar de celebración da romaría de Santo Antón que se atopa entre a mitoloxía ancestral e a relixiosidade popular. Ofrenda ao santo protector e benfeitor o 17 de xaneiro, data de celebración da festividade de Santo Antón abade, venerado na Igrexa Católica.

A localidade de Ábedes (Verín) celebra o 17 de xaneiro a romaría de Santo Antón, máis coñecida como Festa do Chourizo. Comeza pola mañá coa chegada dos romeiros, que poden participar na misa solemne e procesión do santo polos exteriores da capela. Cara ao solpor aparece por primeira vez no ano a máscara do Cigarrón que, látego en man e cun sorriso cínico plasmado na súa careta, anuncia a proximidade do entroido.