O templo, barroco, presenta unha arquitectura de grande austeridade: os paramentos lisos e as portas de ingreso alinteladas. Un óculo aberto na fachada dá luz ao interior, rematando esta con cornixa de ramplas curvas servindo de asento a pináculos nos extremos e á espadaña no centro, con alzado de dous corpos graduados. No interior destaca o retablo maior, distribuído en dúas alturas mediante estípites e banco co relevo do Sacrificio de Isaac. Preside a fornela central a imaxe de San Pedro, flanqueado por San Bartolomé e San Ramón, dentro dunhas fornelas trilobuladas.