Edificio de vivendas para a Compañía Carbonera S.A. proxectado por Jenaro de la Fuente Álvarez en 1942, por encargo de José Francisco López e Guillermo Puime. Destaca a porta de acceso, sobre a que se construíu un antepeito abalaustrado, cun clásico frontón triangular entre os vans da primeira e segunda planta. A súa decoración é totalmente sobria, destacando unicamente ménsulas decoradas e unha pérgola no alto do edificio. Esta falta de elementos decorativos e as formas redondeadas fálannos dun estilo racionalista. Como material construtivo utilizouse granito branco de gran fino, extraído da serra de Castrelos, e pulido na superficie.