Igrexa barroca, de cruz latina, con sancristía lateral, tellado a dúas augas e cruceiro máis elevado, a catro augas e con lanterna. No lateral dereito ten un pórtico novo, con contrafortes e escaleira exterior. Na bóveda do altar ten inscrita a data de 1784, aínda que no arco de triunfo constata unha posterior modificación de 1857. Na fachada presenta unha porta con moldura e dúas pilastras acanaladas. Friso con métopas floreadas. Frontón triangular quebrado, na parte superior un clípeo e dous pináculos laterais. Sobre o frontón atópase unha fornela cun san Bartolomeu. Fachada coroada por unha torre campanario en tres corpos, con arcos de medio punto, pináculos e acabado en cupulín.