Igrexa de orixe románica datada na segunda metade do século XII, con reformas na nave e a sancristía no XVIII, coa desaparición da portada e outros elementos románicos. Ábsida de planta rectangular, ao igual que a nave, de muros de cachotería e cantería de granito e cuberta de tella a dúas augas. A ábsida ten no testeiro unha ventá de medio punto, capiteis zoomorfos e gornición de billetes. Na parte superior dispón de canzorros lisos. Portada principal con lintel, aínda que conserva a pegada do arco de medio punto anterior. O frontispicio remata cunha espadana de dous vans. O retablo maior é de estilo neoclásico e o do lateral esquerdo rococó.