Iniciada a súa construción na 2ª metade do século XII, a maior parte da súa fábrica é do século XIV. Corresponde ao denominado estilo románico de transición, tamén denominado románico-oxival heteroxéneo con influencias cistercenses xa que foron os monxes da devandita orde moradores do Mosteiro de Oia os que culminaron a súa construción. A súa planta é basilical e consta de tres naves. As torres que se proxectan no seu exterior dotan o conxunto de certo aspecto de fortaleza. A portada principal é abucinada e presenta decoración a base de motivos xeométricos. Sobre ela disponse un rosetón sinxelo. Foi instituída Colexiata no ano 1482 polo Bispo Diego de Muros ata o ano 1850.