A aldea da Ponte é o inicio e final deste carreiro de montaña con trazado circular. O percorrido comeza fronte á Igrexa de Santa María  Madalena e pasa xunto á antiga casa-escola, convertida en Centro de Visitantes da ZEC Pena Trevinca. Enseguida bifúrcase a senda: de fronte pódese ascender ao monte O Fial e á Lagoa da Serpe; á dereita a subida será máis suave e alcanza antes a Lagoa de Ocelo.

Optando por esta segunda opción o itinerario ascende por unha pista ata alcanzar o valado metálico do coto cinexético de Xares. A pista ancha continúa ata a Lagoa de Ocelo (1.510 m). Logo, unha estreita senda de montaña en dirección este que bordea a saia do monte O Fial, alcanza a Lagoa da Serpe, relacionada con diversas lendas.

Para regresar, gáñase altura por un camiño empinado ata un magnífico miradoiro sobre a propia lagoa. O roteiro segue unhas roderas que suavemente alcanzan o redondeado cume de O Fial (1.841 m), lugar desde onde observar toda a Serra de Trevinca e os vales do Xares e do Bibei. O descenso á Ponte realízase pola pista de Pena Ferro e o camiño de As Calellas.