A igrexa de Baíñas era a dun mosteiro benedictino medieval, con xurisdición propia, que no século XV pasou a depender do mosteiro compostelán de San Martiño Pinario. Desde aquela foi un priorado que foi desmantelado, probablemente, na Desamortización de 1836. Na igrexa apréciase o templo medieval nos seus canzorros que mostran escenas sexuais, animais e motivos vexetais, ou tamén nos diferentes arcos e contrafortes. Destaca na igrexa o tímpano do muro norte, sobre unha porta hoxe tapiada. Representa un home sobre un cabalo e asóciase coa lenda de San Martiño.