A Axencia de Turismo de Galicia programa dous cursos de formación para empresas e guías turísticos relacionados coa calidade no servizo e o enoturismo, respectivamente, e que se desenvolverán ao longo deste mes de marzo.

Así, mañá mércores, 6 de marzo, a sede de Turismo de Galicia acollerá o curso O valor real da opinión do cliente: o único número a facer medrar, destinado ás empresas turísticas galegas, con preferencia ás certificadas co distintivo Q de Calidade Turística.

Esta actividade de formación contará cun máximo de 20 participantes e ten como obxectivo a análise dos sistemas que se empregan actualmente para obter o feedback dos clientes.

Neste curso poderase coñecer o sistema Net Promoter Score (NPS) de xeito que se poida avaliar a súa filosofía, o seu enfoque e a súa xestión para o negocio turístico, sabendo que é un dos sistemas empregados polas mellores empresas do mundo.

Doutra parte, entre os obxectivos deste curso está coñecer como se pode aplicar á empresa turística, que posición ocupa un negocio determinado no mercado e o sinxelo que é xestionar toda esta información coa ferramenta Opinat.

Por outra parte, entre os días 11 e 13 de marzo, desenvolverase na sede de Turismo de Galicia en Santiago a parte teórica do curso Coñecementos básicos para a visita turística en adegas de Galicia-D.O.P. Ribeiro, destinado a guías turísticos galegos.

A parte prática deste curso terá lugar nas adegas da D.O.P do Ribeiro os días 18 e 19 de marzo.

Esta actividade formativa terá unha duración de 40 horas lectivas e ten por obxectivo facilitarlles aos guías turísticos especializados os coñecementos e as destrezas oportunas para dar información turística e realizar visitas guiadas de calidade e dotalas de contidos rigorosos e específicos sobre a Denominación de Orixe Protexida Ribeiro.