Un grupo de operadores turísticos especializados en turismo relixioso de Indonesia, están a desenvolver unha viaxe de familiarización co destino Galicia. A iniciativa enmárcase dentro do programa de promoción de Turismo de Galicia para a difusión dos valores e os produtos turísticos galegos entre os axentes comercializadores internacionais.

Así, nesta viaxe, os axentes de viaxes de Indonesia están a visitar distintos lugares do territorio galego, tanto da costa como do interior, entre eles a cidade de Compostela, un dos centros de peregrinación máis importantes do mundo, para tomar contacto co Camiño de Santiago e a súa meta. Ademais, na súa estadía en Galicia, os operadores turísticos indonesios tamén visitaron outros destinos galegos relacionados coa natureza, o turismo de costa e a cultura.

Esta actividade de promoción conta tamén coa colaboración da Oficina de Turismo de España en Singapur e a aeroliña Cathay Pacific Airlines que ven de inaugurar un voo diario entre Indonesia e España, o que vai facilitar o acceso de viaxeiros do sueste asiático ao territorio español.

Camiño de Santiago

O turismo relixioso cobra especial importancia na Comunidade galega a través do Camiño de Santiago que no que vai de ano, rexistrou máis de 274.000 peregrinos, o que supón un incremento de máis do 5% en relación ao mesmo período do pasado ano.

Esta cifra supera o número de peregrinos acadado no último Ano Xacobeo 2010 marcando un máximo histórico no ámbito xacobeo. Así mesmo, é salientable o incremento da afluencia de peregrinos procedentes de Indonesia e Singapur que, no que vai de ano, medrou máis dun 26% en relación a todo o ano 2015.