Turismo de Galicia promocionará o turismo galego esta semana na feira Expovacaciones de Bilbao, para difundir os valores, recursos e produtos turísticos galegos entre os cidadáns do País Vasco, un dos mercados turísticos emisores nacionais máis importantes para a comunidade galega.

Trátase dun certame de turismo dirixido ao público final que se desenvolverá dende mañá ata o día 5 de maio no Bilbao Exhibition Center, BEC, situado en Barakaldo, e que este ano chega á súa trixésimo cuarta edición.

Para amenizar a presenza galega nesta feira, durante a fin de semana, no stand de Galicia actuarán dous músicos da Axencia Galega de Industrias Culturais (AGADIC).

Os vascos supuxeron o 4% dos turistas españois que visitaron Galicia o ano pasado.

Doutra parte, e de acordo cos datos do Instituto de Estudos Turísticos de Galicia, os turistas vascos, con algo máis de 19.000 viaxeiros, supuxeron case o 2% no tráfico aéreo de Galicia en 2012.