Un grupo de 30 operadores turísticos de Rusia, Ucraína e Kazajistán realizaron unha visita de prospección a Galicia co obxecto de coñecer os recursos e as posibilidades turísticas da Comunidade galega e organizar futuras viaxes para os seus clientes desde estes países asiático. Esta actividade de promoción é froito das xestións da Xunta, a través da Axencia de Turismo de Galicia coa maiorista Marfil, que opera nestes mercados con estas axencias de viaxe.

O obxectivo desta viaxe, que se desenvolveu entre os días 9 e 13 de maio, é dar a coñecer entre estes operadores turísticos os produtos turísticos relacionados coa cultura, a natureza, o enoturismo o turismo mariñeiro e o turismo termal con visitas aos centros históricos das cidades da Coruña, Santiago de Compostela e Pontevedra, así como as vilas de Baiona, Cambados e Allariz; facendo un percorrido polas Illas Cíes, visitando adegas nas Rías Baixas; realizando un cruceiro pola Ría de Arousa; e visitando as instalación termais dos hoteis da Illa da Toxa.

O día 10 de maio, os operadores turísticos achegáronse ata Santiago de Compostela, onde visitaron a Cidade da Cultura de Galicia, a Catedral e o Centro histórico.

Rías Baixas e Allariz

Na súa estadía en Galicia, os axentes de Turismo asiáticos tamén visitaron o día 11 de maio a cidade de Pontevedra, O Grove, Sanxenxo, Portonovo, a Illa da Toxa, e Cambados.

O día 12 de maio, puideron coñecer Baiona e o Parque nacional marítimo terrestre das Illas atlánticas de Galicia, visitando as Illas Cíes.

Por último, o día 13 de maio, os operadores de Rusia, Ucraína e Kazajistán visitaron a vila ourensá de Allariz.

Esta é a segunda viaxe de familiarización deste tipo que se realiza co obxecto de promocionar o destino Galicia en Rusia e nos países da súa contorna, logo de que en outubro de 2012, dezasete operadores turísticos rusos visitarán tamén Galicia da man de Turismo de Galicia e a maiorista Marfil.