O Consello da Xunta aprobou hoxe o decreto polo que se concede o título de Embaixador de Honra do Camiño de Santiago á S.A.R. O Príncipe de Asturias. A concesión deste título está regulada no Decreto 163/2013, de 24 de outubro, e é o titular da Presidencia da Xunta de Galicia quen realiza a concesión do mesmo.

O pasado día 23 de outubro, o presidente da Xunta de Galicia remitiu ao xefe da Secretaría da S.A.R. unha carta na que lle informaba da aprobación do devandito decreto polo que se regula o título de Embaixador de Honra e lle trasladaba o convite para o seu nomeamento como o primeiro Embaixador de Honra do Camiño de Santiago, como recoñecemento ao permanente apoio da Casa Real na Promoción e defensa dun dos principais símbolos de Galicia, de España e de Europa no mundo.

En comunicación recibida o 28 de novembro deste ano, o xee da Casa da S.M. O Rei transmitiu a aceptación do Príncipe e o seu nomeamento como Embaixador de Honra do Camiño de Santiago.

O Príncipe de Asturias terá o título de Embaixador de Honra polo seu apoio constante ao longo do tempo, a través dos seus xestos de recoñecemento cara a Ruta Xacobea, manifestando a súa condición de peregrino en distintas ocasións así como mediante a súa participación nos actos dos Anos Santos ou como divulgador dos valores xacobeos en todo o mundo. O título acredita, de igual modo, a axuda prestada pola S.A.R. na difusión, promoción e coñecemento do Camiño de Santiago e dos valores asociados a el, así como o seu compromiso de futuro para a divulgación do culto e a cultura xacobea.