Turismo promove o golf sénior en Galicia a través do VII Circuíto Camiño de Santiago e o V Open Rías Baixas
A Xunta patrocina un premio especial á mellor parella de máis de 50 anos e 55 anos para xogar a final no campo de golf Balneario de Mondariz, en Ponteareas, o 27 de setembro.
No Open Rías Baixas xogaranse 4 torneos ao longo desta semana.
Fixar Galicia como un dos destinos preferentes para a práctica do golf entre as categorías sénior é o obxectivo das accións de promoción que Turismo de Galicia leva a cabo esta semana no VII Circuíto Camiño de Santiago e no V Open Rías Baixas.
O Circuíto Camiño de Santiago é un torneo que conta con seis probas clasificatorias e e que o vindeiro día 21 de xuño chega ao campo de Montealegre, preto da cidade de Ourense.
Neste caso, Turismo de Galicia patrocinará un premio especial para a parella sénior mellor clasificada que consiste no convite a participar na final de invitacións que se celebrará no campo de golf Balneario de Mondariz, en Ponteareas, o día 27 de setembro.
Rías Baixas
Ademais, e co mesmo obxectivo, incentivar a práctica do golf sénior na Comunidade galega, Turismo de Galicia patrocinará a participación das mellores parellas sénior na final de invitacións que se celebrará o día 21 de xuño, tamén no campo de golf Balneario de Mondariz.
O Open Rías Baixas conta con catro torneos que se celebran os días 18, 19, 20 e 21 de xuño.
Por outra parte, o pasado mes de maio Galicia acolleu a V edición do Torneo de golf Peregrinación, un evento deportivo patrocinado por Turismo de Galicia para promover a práctica deste deporte na Comunidade galega.
Este torneo estivo enfocado ao público sénior e participaron 210 golfistas da Asociación Española de Séniors de Golf, AESGOLF, procedentes de España e Portugal, que ademais de competir neste evento puideron gozar da oferta turística galega.