Igrexa de orixe Románico, con importantes reformas ao longo da historia. A súa planta é rectangular e no lateral esquerdo pégase a sancristía con acceso dende o exterior, cun pequeno cabido cuberto. Os muros son de cachotaría e cadeirado de granito, e a cuberta de lousas de granito a dous, tres e catro augas. Só conserva a nave da fábrica Románica a portada S. que presenta arco de medio punto con tres arquivoltas baquetonadas de sección rectangular. Esta decórase cun arco en cada doela con diversos motivos no seu interior. De gornición ten unha fina moldura tórica dentada e impostas con dentes de serra e incisións cadradas. As columnas son de tres ordes con capiteis con motivos zoomorfos, antropomorfos e xeométricos. O tímpano presenta moita decoración, ademais dunha inscrición: ANNUS AB CARNATIONE DNI Mº Cº LXXVII/I ERA M CCX. O presbiterio sepárase da nave por medio dun arco triunfal de aresta, con bóveda de canón con lunetos.