Galicia presenta a súa oferta turística 2017 en Cataluña, comunidade da que recibiu máis de 230.000 visitantes en 2016

O departamento de Turismo da Xunta promove o destino Galicia no salón B Travel, o principal mercado turístico desta comunidade autónoma

A oferta turística galega promóvese estes días en Cataluña, que con preto de 230.000 viaxeiros aloxados e 500.000 pernoitas nos establecementos turísticos de Galicia, situouse como un dos mercados emisores máis importantes para a Comunidade galega durante o pasado ano 2016.

Cataluña é o cuarto mercado en orde de importancia dentro do segmento receptor nacional, por detrás de Madrid, Castela e León e Andalucía.

Así, no ano 2016, presentou un comportamento positivo incrementando nun 6,1% a cifra de viaxeiros aloxados e nun 13,2% o volume de noites do anterior ano 2015.

Salón B Travel

Deste xeito, para incentivar aínda máis este fluxo de viaxeiros de Cataluña, Turismo de Galicia participou cun recinto de promoción propio na III edición do Salón B-Travel, herdeiro do Salón Internacional de Turismo de Cataluña (SITC) que se celebrou durante 23 anos no recinto da Fira de Barcelona.

Turismo de Galicia participou este ano cun expositor de deseño de 104 metros cadrados, no que se dispuxo de módulos dedicados a Experiencias, Camiño de Santiago, Festas, Espazos naturais, Starlight e á oferta en xeral.

No espazo estivo representada a Consellería de Medio Ambiente, a través da Dirección Xeral de Conservación da Natureza que dispuxo dun espazo propio dentro do stand de Turismo de Galicia.

Neste certame, o organismo autonómico de promoción turística tivo moi presente a promoción da Ruta Xacobea entre os cataláns, así como os produtos turísticos relacionados coa costa e o interior de Galicia, así como a enogastronomía.

O Salón B Travel é unha das plataformas turísticas máis importantes da oferta e os servizos turísticos no ámbito nacional e un importante reforzo para a promoción do turismo galego en Cataluña.