O  Centro BTT Ribeira Sacra acolleu a pasada fin de semana unha visita guiada organizada por Turismo de Galicia, a través de BTT Galicia, para dar a coñecer as posibilidades que ofrece esta instalación deseñada para a práctica da bicicleta de montaña.

Esta actividade forma parte dun programa de visitas destinada a afeccionados da bicicleta todoterreo que comezou o pasado 25 de xuño no centro BTT O Salnés e rematará o vindeiro 30 de xullo no centro BTT Portas de Galicia.

Ademais dos percorridos polos centros BTT O Salnés,Ribeira Sacra e Portas de Galicia, o día 23 de xullo terá lugar a visita guiada ao Centro BTT Serra do Xurés.

Esta actividade é gratuíta e está limitada a 40 persoas por acontecemento que se poderán apuntar vía online a través do enderzo electrónico htttp://.magmasports.es/spa/eventos.php.

BTT Galicia

Centros BTT Galicia é un proxecto a medio prazo que pretende dotar á Comunidade Autónoma de Galicia dunha rede de espazos para a práctica con bicicletas todo terreo (BTT)

Un Centro BTT é un espazo ao aire libre, deseñado e preparado para usuarios da bicicleta de montaña, que posibilita o coñecemento do medio rural e natural a través da desta práctica deportiva.

Así, os usuarios poden atopar todo tipo de servizos e rutas para esta práctica deportiva na Comunidade galega.

Constan dun espazo de acollida e información, onde se ofrecen servizos como o de alugueiro de bicicletas, servizo de limpeza, vestiarios ou duchas, así como información específica das rutas turísticas da zona na que está implantado. Forman parte do centro BTT un conxunto de rutas, de diferentes niveis de dificultade, que suman polo menos 100 quilómetros de lonxitude, convenientemente trazadas e sinalizadas pola comarca na que radica o centro.