Máis de 30.000 asistentes á 43 edición do Festival Intercéltico de Lorient (Francia) visitaron o pavillón de Galicia instalado por Turismo de Galicia para a promoción da cultura e o turismo da Comunidade galega na cidade bretona entre o 2 e o 11 de agosto. Esta cifra supón un incremento de 4.000 visitantes en relación á edición do ano anterior.

Esta notable afluenza de público fíxose visible nas colas da entrada en cada xornada, especialmente nas horas do xantar, das ceas e das actuacións dos grupos galegos, cun cheo total.

A maioría dos visitantes foron familias completas, parellas e grupos de amigos, procedentes non so da Bretaña, senón do resto de Francia, países fronteirizos, así como do resto de rexións ou nacións de influencia celta. Pódese dicir que Galicia xa é un referente neste Festival.

Por outra parte, nos puntos de información turística do stand, o público bretón mostrou o seu interese pola nosa Comunidade demandando toda clase de información sobre Galicia. Así, os contidos máis demandados referíronse ás tradicións, o Camiño de Santiago, espazos naturais, aloxamentos turísticos e gastonomía.

Escenario musical

Ademais, pavillón galego de 200 metros cadrados serviu de escenario musical para a promoción da música folk galega a través deste evento. Así, entre os días 2 e 11 de agosto, actuaron os músicos Ismael García e Xesús Rodríguez, gaita e percusión, respectivamente, que participaron no concurso do Trofeo MacCrimmon, organizado polo Festival, e amenizaron estas xornadas de difusión turística e cultura de Galicia.

Ademais, entre os días 2 e 6 de agosto acturaron no stand de Galicia os grupos Trimuiños, Trécolas e Tromentelos e entre os días 7 e 11, o grupo Os D`abaixo