A Oficina de Acollida ao Peregrino da rúa do Vilar rexistrou entre o 1 de xaneiro e o 5 de outubro un total de 193.101 peregrinos que recolleron a Compostela tras teren percorrido algunha das Rutas Xacobeas. Isto supón que na primeira semana do mes de outubro de 2013 xa se teña rebasado a cifra global de peregrinos chegados durante todo o ano pasado, que alcanzou os 192.488 camiñantes.

A directora de Turismo de Galicia, Nava Castro, resaltou os bos resultados obtidos este ano, tanto no que respecta ao crecemento na cifra de peregrinos que se veu rexistrando ao longo do ano e que demostra que “o Camiño de Santiago é un elemento vivo e diferenciador do noso destino”; como no tocante aos bos resultados obtidos en canto á cifra de viaxeiros aloxados nos establecementos regrados de Galicia no que vai de ano e nomeadamente no verán.

No que vai de ano, chegaron a Compostela un total de 97.044 peregrinos procedentes do territorio español, isto é, o 50,26% dos peregrinos. Un total de 97.057 peregrinos foron estranxeiros, en total un 49,74% dos peregrinos que chegaron a Santiago neste período procedían doutros países. En concreto, e por esta orde, os grupos de peregrinos estranxeiros máis numerosos procederon de Italia, Alemaña, Portugal, Estados Unidos, Francia, Irlanda, Reino Unido, Holanda, Canadá, Australia, Polonia, Brasil, Corea, Bélxica, Dinamarca, Austria, México, Suíza e Suecia.

En total, en comparación cos rexistrados no mesmo período de 2012, chegaron a Compostela 11.348 peregrinos estranxeiros máis. Isto implica unha suba na cifra de peregrinos procedentes doutros países do 13,39%. Onte mesmo, chegaron a Santiago un total de 1.059 peregrinos, dos cales 614, isto é o 57,98%, foron estranxeiros. De igual modo, a cifra global de peregrinos recibida en comparación co mesmo período de 2012 alcanza unha suba do 12,73%, con máis de 21 mil peregrinos recibidos máis que entre o 1 de xaneiro e o 5 de outubro do ano pasado.

Por camiños, a suba rexistrada neste período ten sido do 12,9% máis no Camiño Francés; do 18,25% máis no Camiño Portugués; do 3,24% máis no Camiño Norte; do 8,08% máis no Camiño Primitivo; do 7,61% máis na Vía da Prata. No Camiño Inglés a suba acadou o 25,47% máis de peregrinos que no mesmo período de 2012 e na Ruta Fisterra-Muxía rexistrouse un 9,8% máis de peregrinos.

No tocante ás pernoitas rexistradas na rede pública de albergues, a cifra acadou nos nove primeiros meses deste ano as 301.148 pernoitas, o que implica unha suba de case o 2% sobre as rexistradas nos nove primeiros meses de 2012.