Os establecementos hoteleiros galegos rexistraron nos nove primeiros meses do ano un incremento na cifra de viaxeiros aloxados do 5,9%, rexistrando algo máis de 2,7 millóns entre xaneiro e setembro, o nivel máis elevado dende 2008, agás no Ano Santo 2010.

Tamén a cifra de pernoitas superou os 5,5 millóns no conxunto da comunidade, o que implica unha suba do 2,5%. A nivel estatal, Galicia ten rexistrado a segunda taxa de crecemento máis elevada da cifra de viaxeiros aloxados, só superada por Navarra e tamén en termos de pernoitas se sitúa no grupo de comunidades con mellores resultados.

 

O turismo estranxeiro superou nun 13% a cifra de viaxeiros e nun 10% a cifra de pernoitas rexistradas por este segmento nos nove primeiros meses de 2012.

Ocupación hoteleira en setembro.

Galicia rexistrou durante o mes de setembro un total de 392.287 viaxeiros aloxados nos establecementos hoteleiros. Isto implica unha suba do 7,1% a respecto da cifra rexistrada no mesmo mes do ano pasado. Esta cifra é similar á rexistrada en 2007, ambas constitúen as máis elevadas nun ano non santo.

 

De igual modo, a cifra de pernoitas rexistradas neste tipo de establecementos en Galicia foi de 775.000, o que implica unha suba do 5% a respecto de setembro de 2012. A suba dos viaxeiros nos establecementos hoteleiros do conxunto do Estado foi do 1,3% e a de pernoitas do 2%.

 

Galicia sitúase no grupo das comunidades máis dinámicas do Estado. Neste mes de setembro produciuse un bo comportamento do turismo nacional, con subas na cifra de viaxeiros do 9,8% neste segmento e na cifra de pernoitas do 7,9%.

 

De igual modo, a cifra de viaxeiros estranxeiros aloxados nos establecementos hoteleiros de Galicia acadou neste mes de setembro máximos históricos porque por primeira vez se superaron os 120.000 viaxeiros que efectuaron preto de 200.000 pernoitas. Isto implica un máximo histórico deste segmento no peso do conxunto da demanda. Os viaxeiros estranxeiros acadan xa o 31,3% do total de viaxeiros aloxados nos hoteis e pensións de Galicia.

 

Ao tempo, a recuperación dos niveis de demanda, permite mellorar os niveis de rendibilidade hoteleira, de modo que o ingreso medio por habitación dispoñible –RevPAR- experimentou unha suba do 3% con respecto ao dato do ano pasado.

 

A nivel territorial, obsérvase neste período un crecemento xeneralizado da demanda. Soben as pernoitas hoteleiras nas catro provincias galegas, con maior intensidade na Coruña e en Lugo, cun 7,6% e un 10,9% respectivamente e superando o 1% en Ourense e Pontevedra no mes de setembro a respecto do mesmo mes do ano pasado.

 

Galicia rexistrou no terceiro trimestre un 10,7% máis de viaxeiros e un 6,2% máis de pernoitas que no terceiro trimestre do ano pasado.

 

Por primeira vez nun ano non santo a cifra de viaxeiros aloxados aproxímase aos 1,4 millóns no terceiro trimestre. O turismo interno subiu un 3,3%, o receptor nacional un 6,5% e o internacional un 8,8%. Neste período, acadouse o máximo histórico de viaxeiros no segmento de turismo internacional, con algo máis de 350 mil. De igual modo, o 25,2% dos viaxeiros aloxados corresponden ao segmento do turismo internacional.

 

No que vai de ano, chegaron a Santiago un total de 205.532 peregrinos, dos cales o 49,3% foron estranxeiros. Isto supón que ata o día de hoxe chegaron a Santiago un total de 22.035 peregrinos máis que no mesmo período do ano pasado, isto é, un 12% máis.