Turismo de Galicia desenvolveu en Arxentina unha acción promocional do destino Galicia dirixida aos principais operadores turísticos do país, nun acto organizado para presentar o número especial da revista Cuisine & Vins dedicado á Comunidade galega.

Nesta presentación, que tivo lugar na cidade de Bos Aires, abordáronse as oportunidades turísticas de Galicia e as posibilidades da Comunidade autónoma para a recepción de turistas arxentinos. O Camiño de Santiago e o fenómeno das peregrinacións, así como os principais produtos turísticos de Galicia relacionados coa costa, a gastronomía, o termalismo, o golf, o Turismo náutico, a natureza e a cultura, entre outros; protagonizaron o acto promocional.

Cuisine & Vins
Este evento desenvolveuse con motivo da presentación do número especial dedicado a Galicia da revista de gastronomía Cuisine & Vins, unha das máis prestixiosas do seu xénero na Arxentina. A publicación leva máis de 25 anos no mercado e está especializada na promoción e comercialización de produtos enogastronómicos no país austral.