Turismo de Galicia ten esta semana dúas novas citas con dúas das feiras de promoción e comercialización turística especializada máis importantes do calendario en España. Trátase da feira INTUR, que se celebra en Valladolid, e a EITBM, que terá lugar en Barcelona.

Deste xeito, Turismo de Galicia instalará na capital do Pisuerga, dentro do certame INTUR, un stand de 168 metros cadrados para a promoción e apoio á comercialización dos produtos turísticos galegos relacionados coa natureza, o deporte, a cultura e a gastronomía.

INTUR celebra este ano a súa XVIII edición e continúa a ser un dos referentes nacionais para a promoción turística interior. Entre o seu público conta con moitos clientes turísticos de Galicia e persoas interesadas pola oferta da Comunidade galega.

O público de INTUR séntese especialmente atraído polo Camiño de Santiago, os espazos naturais de Galicia, a costa e o turismo rural.

Congresos
Por outra parte, entre os días 19 e 21 de novembro, Turismo de Galicia acudirá ao certame especializado na promoción e comercialización de congresos e reunións corporativas EIBTM, que terá lugar en Barcelona. Esta feira constitúe o principal evento de difusión para o sector turístico relacionado cos congresos, no que participan máis de 4.000 axentes nacionais e internacionais.

Así, un ano máis, Turismo de Galicia estará presente nesta feira cun mostrador que compartirá con: Santiago de Compostela Convention Bureau, Turismo da Coruña, Palexco, OPC Galicia, Abramar DMC, DMC Galicia e Helena Maseda.