No marco das accións incluídas nos actos conmemorativos do VIII Centenario da Peregrinación de San Francisco de Asís a Santiago, a directora de Turismo de Galicia, Nava Castro e mais o alcalde de Rieti, Simone Petrangeli asinaron hoxe un acordo no que se establecen accións colaborativas entre ambas administracións. De xeito que, en virtude do protocolo, Turismo de Galicia comprométese á produción da mostra Santiago Peregrinatio, cedendo temporalmente a mesma para a súa exposición en Rieti dentro do primeiro semestre do ano 2014.

Ao tempo, promoverá accións de difusión e promoción do Cammino di Francesco ao seu paso por Rieti.

Pola súa banda, o compromiso do Comune di Rieti pasa polo préstamo de 3 Beléns orixinarios do Santuario Francesco del Presepe di Greccio para a exposición organizada por Turismo de Galicia a través do Xacobeo Francisco e a memoria do neno Xesús: Belén e Escenas de Nadal na Cultura Barroca, que se celebrará en decembro deste mesmo ano.

De igual modo, Rieti cederá temporalmente a mostra fotográfica Cammino di Francesco con fotos de Stve Mc Curry para a súa exposición en Santiago no primeiro semestre do ano 2014. Ao tempo, promoverá a realización de accións promocionais do Camiño de Santiago.

Rieti
A cidade de Rieti atópase no centro de Italia e conserva santuarios franciscanos, entre os que destaca o Santuario Francescano de Presepe, o lugar onde se representou o primeiro nacemento vivinte e que está irmandado con Belén, en Palestina.

San Francisco de Asís, fundador da Orde Franciscana, foi o iniciador dos nacementos entre os anos 1200 e 1226. Na ermida de Greccio foi onde tivo a inspiración de reproducir en vivo o misterio do nacemento de Xesús.

Rieti conta con numerosos recursos da arquitectura civil e relixiosa asociados á vida do santo de Asís, como a Catedral, o Pazo Episcopal, a Igrexa de San Francisco, as capelas da Magdalena e San Miguel, o Sacro Speco, a fonte das Pombas ou a Igrexa de Santiago.

O VIII Centenario da Peregrinación de San Francisco a Santiago
A directora de Turismo de Galicia recalcou que o VIII Centenario constitúe “un período extraordinario que se dedicará ao aniversario da memoria da viaxe de San francisco, pero fundamentalmente ao seu legado a nivel iconográfico e artístico e de patrimonio inmaterial”.

Ao tempo, lembrou outros acordos xa asinados no marco do VIII Centenario como o asinado co Ministro Xeral da Orde Franciscana; o asinado coa Organización Mundial do Turismo e a Secretaría de Estado de Turismo, ou o rubricado co Concello de Asís.

A cidade de Xénova acolle agora a mostra comisariada por Paolo Caucci, presidente do Comité Internacional de Expertos do Camiño de Santiago Nel segno del Tau e della Conchiglia. Da Assisi a Santiago sulle orme de San Francesco, que está acompañada de outra exposición audiovisual titulada Os franciscanos e o bo xantar na terra do Apóstolo que centra a súa temática na produción vitivinícola galega vinculada ca situación dos conventos franciscanos e de clarisas.

Nava Castro destacou tamén a aposta de Galicia polo turismo cultural, así como no feito de que no que vai de ano, máis de 15 mil peregrinos italianos recolleron a Compostela na Oficina de Acollida ao Peregrino da rúa do Vilar. Isto supón o 7,4% dos total de peregrinos que chegan a Santiago, sendo Italia o segundo país estranxeiro que máis peregrinos aporta. A cifra de peregrinos italianos incrementouse no que vai de ano un 26,62% a respecto do mesmo período do ano pasado.