A sede do Instituto Cervantes de Hamburgo acolle desde onte o simposio ‘A Rosa dos ventos da xeografía xacobea en Europa’, un evento que se celebrará ata o día 8 de outubro e no que participan os máis sobresaíntes investigadores das peregrinacións xacobeas.

Este simposio celébrase coa colaboración de Turismo de Galicia e do Centro de Estudos Galegos da Universidade de Kiel, e na inauguración de hoxe participou o xefe da Área de Cultura Xacobea da S.A. de Xestión do Plan Xacobeo, Francisco Singul.

Esta xuntanza profesional conta cun bo número de insricións e entre os investigadores que participan se atopan o presidente do Gremio de expertos, Paolo Caucci von Saucken, os presidentes das asociacións alemá e francesa, Klaus Herbers e Adeline Rucquoi.

O simposio, cuxo cartel conta cun motivo orixinal do artista galego Antón Lamazares, está organizado polo Centro de Estudos Galegos da Universidade de Kiel e dirixido por Javier Gómez-Montero. Ademais conta co apoio da Deutsche Forschungsgemeinschaft, enmarcado no Programa de Acción Cultural exterior HISPANEX do Ministerio de Educación, Cultura e Deporte e de Turismo de Galicia. Completa a representación oficial a conselleira de Cultura da Embaixada de España en Berlín, Gloria Mínguez Repiñón, e a directora do Instituto Cervantes en Hamburgo, Helena Cortés Gabaudan.

Entre os actos públicos destaca a presentación polo presidente de honra da Asociación xacobea alemá, Robert Plötz, do libro ‘Imaginarios jacobeos en América’, coordinado por Javier Gómez-Montero, catedrático do Romanisches Seminar da Universidade de Kiel e responsable do Centro de Estudos Galegos de Kiel, e coa coordinación adxunta á edición da profesora mexicana de Kiel Jimena Hernández Alcalá.

Neste volume, que consta de doce estudos e cinco cadernos de imaxes a toda cor, analízanse as manifestacións do culto a Santiago en América Latina que representan formas de apropiación cultural dos mitos xacobeos e supón unha orixinal achega á antropoloxía cultural dos mitos arredor de Santiago Apóstolo que conforman un imaxinario que deixou unha fonda pegada en contos, lendas e poemas contemporáneos, iconografía popular e sacra, tradicións orais e monumentos arquitectónicos.

Tamén terá lugar a lectura e coloquio co autor, e profesor de literatura na Universidade de Oxford, John Rutherford sobre a súa novela ‘As frechas de ouro’, título onde se mostra o trasfondo máis humano do Camiño a través da voz dun peregrino inglés, e a conferencia “Zingari postmedievali in itinere Beati Iacobi” a cargo de Robert Plötz, presidente de honra da Deutsche St. Jakobsgesellschaft.