Xerar difusión mediante publicacións nos medios de comunicación locais e especializados e ofrecer información turística e deportiva ao obxecto de atraer os golfistas holandeses e do resto de Europa para que coñezan a oferta para a práctica do golf na Comunidade galega, este foi o obxectivo da presenza de Turismo de Galicia no torneo ‘KLM Open 2016’ que se celebrou en Holanda .

Con estas premisas, o departamento de Turismo da Xunta instalou un expositor no campo de Spijk no que os visitantes puideron obter información turística xeral e específica das posibilidades que ofrece a Comunidade galega para a práctica do golf, ademais de promover o turismo galego a través de contactos cos medios de comunicación, asociacións de golfistas e operadores turísticos especializados.

Neste ámbito, Holanda conta con 150 campos de golf e 282.000 licencias federativas de xogadores de golf, o que significa que unha porcentaxe elevada da poboación practica este deporte. Estes datos confiren a este país como una potencial emisor de xogadores de golf cara Galicia.

Enlaces aéreos
A este respecto, tamén compre sinalar que na actualidade existen conexións aéreas directas entre Galicia e Holanda o que facilita o acceso á Comunidade galega dos visitantes holandeses.

O ‘KLM Open 2016’, é un torneo do Circuíto Europeo Profesional, e conta cunha participación dos mellores xogadores de Europa, así como de América, Asia, Oceanía e África, ademais de concentrar un gran número de espectadores, non só holandeses, senón de distintos países limítrofes como Bélxica, Francia, Alemaña, Reino Unido, ou Dinamarca que son de interese para o noso destino.