A conmemoración da peregrinación de San Francisco de Asís a Santiago de Compostela que Galicia ven celebrando dende mediados de 2013 chegou á súa fin.

Este extraordinario período dedicado ao aniversario da memoria da viaxe de San Francisco, pero fundamentalmente ao seu legado a nivel iconográfico, artístico e de patrimonio inmaterial, foi clausurado hoxe nun acto que contou coa participación da directora de Turismo de Galicia, Nava Castro, e o Ministro Provincial dos Franciscanos, José Antonio Castiñeira.

O alcance global da peregrinación a Santiago de Compostela e a popularidade ecuménica do Santo de Asís converteron esta conmemoración nun evento de alcance internacional que uniu as sensibilidades xacobea e franciscana.

Durante o acto de clausura, a directora de Turismo de Galicia destacou que esta celebración impulsou a dinamización turística e cultural de Galicia a través dos significados e valores da peregrinación xacobea dun dos grandes personaxes da historia da Humanidade.

“Esta conmemoración acadou unha transcendencia nacional e internacional que puxo de manifesto o recoñecemento da figura do Santo de Asís e a amplísima tradición do seu paso polo Camiño de Santiago”, afirmou Nava Castro.

A directora de Turismo de Galicia fixo balance do amplo programa celebrado no marco desta conmemoración que incluíu todo tipo de acontecementos culturais, artísticos e sociais, actuacións de investigación, así como iniciativas relacionadas co desenvolvemento turístico e a acollida ao visitante.

Así, Nava Castro sinalou que se celebraron numerosas exposicións que recibiron máis de 270 mil visitantes e converteron Galicia no epicentro cultural durante este período de celebración.

Así mesmo, Galicia converteuse no escenario de grandes eventos como a final de La Vuelta, a peregrinación conmemorativa desde Asís ou a Primeira Travesía Náutica desde Xénova a Galicia, entre moitos outros.

Ademais, grazas a esta celebración a nosa comunidade tivo a oportunidade de albergar grandes citas congresuais como o Congreso Internacional sobre Turismo Peregrinacións e da OMT, a reunión do Consello Executivo da OMT ou o Primeiro Encontro Internacional de Asociacións de Amigos do Camiño de Santiago.

A directora de Turismo de Galicia destacou que esta efeméride déixanos ademais como legado un total de 20 publicacións e a restauración de pezas de grande valor que recuperaron o seu esplendor como o Pazo de Xelmírez, a Cruz de Allariz e o Retablo de Santo Antonio de Herbón.

O Oitavo Centenario tamén foi música e teatro, xa que a través de programas como Cultura no Camiño máis de 170 concellos galegos puideron gozar de 700 actuacións.

Por outra parte, a responsable de Turismo da Xunta resaltou que esta celebración serviu como estímulo para a participación do sector privado en numerosos proxectos.

Así mesmo, a directora de Turismo de Galicia recordou que neste ano comeza outro período moi especial, un Ano Santo extraordinario convocado polo Papa que comezará o próximo decembro e que estará centrado nun dos seus conceptos máis predicados: a misericordia.

Descubrir Galicia dunha maneira única
Nava Castro sinalou que “este amplo programa incrementou o atractivo de Galicia como destino para todos aqueles viaxeiros que querían descubrilo desde outra perspectiva”.

Así, segundo destacou a responsable de Turismo da Xunta, durante o 2014, ano central desta conmemoración, Galicia recibiu máis de 4 millóns de viaxeiros, incrementando a cifra acadada no 2013 nun 7%. Destes viaxeiros, 115.000 precederon de Italia, incrementándose a cifra de turistas italianos nun 29% en relación ao dato do anterior ano 2013.

“Ademais, o Camiño de Santiago acolleu máis de 237 mil peregrinos que quixeron, ao igual que o fixo San Francisco, deixar a súa pegada na Ruta Xacobea”, afirmou Nava Castro engadindo que esta cifra supuxo un incremento de máis do 10% en relación aos peregrinos rexistrados no 2013.

Así mesmo, a directora de Turismo de Galicia destacou o espectacular incremento dos peregrinos italianos que chegaron a Compostela no 2014 que converteron a Italia no primeiro país estranxeiro en procedencia de peregrinos, superando a cifra dos 20 mil, case un 30% máis que no 2013.

“Uns datos que, sen dubida, demostran o alcance e repercusión acadada por esta conmemoración”, afirmou Nava Castro.