O Camiño de Santiago entra na segunda quincena do mes de xullo cun novo rexistro histórico. No que vai de ano, cun total de 109.625 persoas rexistradas entre os días 1 e 12 de xullo de 2015, o número de peregrinos que recibiron a Compostela medrou un 13,06% en relación ao mesmo período de 2014, e os estranxeiros xa supoñen o 57,99% de toda a afluencia.

No que vai de ano chegaron a Santiago 46.052 peregrinos españois, fronte aos 63.573 doutras nacionalidades. Deste xeito, son 12.666 persoas máis as que fixeron xa o Camiño de Santiago en 2015, en relación aos mesmo período de 2014, cando o fixeron 96.959 peregrinos, dos que 40.182 (42,09%) foron españois e os 56.147 restantes foron estranxeiros (57,91%).

Polo que respecta ás rutas, e segundo os datos da Oficina do Peregrino, nestes primeiros meses do ano, O Camiño Francés acaparou 73.410 peregrinos, o 66,96% do total; o Portugués, 18.326, o 16,72%; o do Norte, 5.297, o 4,83%; o Camiño do Sueste, 4625, o 4,22%; o Primitivo, 4.079, o 3,72%; o Inglés, 3.281, o 2,99%; o Camiño Muxía-Fisterra cara a Santiago, 364, 0,33%; o Camiño de Inverno, 81, o 0,07%, e outros camiños, 157, o 0,14%.

Peregrinos estranxeiros
De acordo con estes datos, entre o 1 de xaneiro e o 12 de xullo, Alemaña, con 9.333 persoas, encabeza a listaxe de peregrinos estranxeiros e séguelle Italia, con 7.464 peregrinos.

Estados Unidos xa é o terceiro país estranxeiro, con 6.834 peregrinos no que vai de ano. Logo do país americano, Portugal, con 6.562, é o país que máis peregrinos achega; seguido de Francia, con 4.509, Irlanda, con 2.810 e Reino Unido, con 2.532.

O segundo país americano no número de peregrinos rexistrados neste período é Brasil, con 2.054 peregrinos e o primeiro asiático é Corea, con 2.025 peregrinos rexistrados no que vai de ano.

Nesta listaxe séguenlle Holanda, con 1.955 peregrinos, Australia, con 1.795 peregrinos, Canadá, con 1.753 peregrinos, e Polonia, con 1.092.