Os xardíns de inverno da Comunidade galega, sobre todo os que albergan camelias, atópanse entre os meses de febreiro e abril no seu mellor momento e por iso Turismo de Galicia desenvolve unha campaña para promover as visitas a estas contornas tan específicas do territorio galego.

Así, durante a segunda quincena de febreiro e ata o vindeiro 18 de marzo, o departamento de Turismo da Xunta desenvolve unha campaña de difusión nos medios de comunicación de Galicia ao obxecto de incentivar as visitas a estes xardíns e ás súas contornas, que inclúen pazos e outros edificios históricos.

Ademais desta acción de promoción, Turismo de Galicia ten destacado na súa web o apartado ‘Pazos e xardíns da Ruta da camelia”, no que se atopan todos os recursos do produto ruta da camelia e os enlaces ás páxinas web dos pazos que contan con presenza en Internet.

Por outra parte, no site de Turismo de Galicia os usuarios poden atopar o calendario de exposicións relacionadas coa camelia para este ano 2016, que comezaron o pasado 16 de xaneiro en Tui e rematarán o 11 de decembro en Boiro.

Ruta da camelia
A camelia forma parte do patrimonio histórico e botánico da xeografía galega e da súa potencialidade como recurso turístico, un recurso que incide na imaxe de Galicia como destino experiencial, destino evocador de emocións e sensacións.

Para dar a coñecer este símbolo de identidade Turismo de Galicia impulsa e difunde a Ruta da Camelia, que converteuse xa nun referente internacional.

Esta ruta está constituída por 12 contornas que inclúen parques e xardíns públicos, e instalacións privadas, adegas e outros edificios históricos que conforman un patrimonio único, posto en valor como un dos produtos turísticos máis singulares da Comunidade galega.

Na actualidade, forman parte da Ruta da cameleia a Alemeda de Santiago, a Casa-museo de Rosalía de Castro, o Castelo de Soutomaior, o Parque do Castro, o Pazo da Saleta, o Pazo de Lourizán, o Pazo de Mariñán, o Pazo-Museo Quiñones de León, o Pazo de Oca, o Pazo de Quinteiro da Cruz, o Pazo de Rubiáns e o Pazo de Santa Cruz de Ribadulla.

A través dela, pódese descubrir os diferentes recursos dos concellos nos que se sitúan estes enclaves e xardíns adornados con exemplares desta planta.

A Ruta da Camelia convértese así no fío condutor para ir descubrindo o noso patrimonio vexetal, natural, a a arquitectura dos nosos pazos, o noso patrimonio eclesiástico e monástico; a riqueza da nosa gastronomía de costa e de interior. Todos eles son reclamos turísticos en si mesmos pero adquiren un significado especial se se descobren a través das cores das camelias en Galicia.