Turismo de Galicia participou na feira ‘International Tourism & Travel Show’ que se desenvolveu a pasada fin de semana na cidade de Montreal (Canadá). Trátase da feira de maior relevancia do país xa que Montreal é una das cidades máis poboadas xunto con Toronto.

Nesta cita, aberta tanto a profesionais como a público xeral e que cada ano rexistra unha importante afluencia de visitantes, o departamento autonómico de Turismo promocionou os principais valores turísticos da comunidade galega, dentro do recinto que instalou Turespaña.

Así, Turismo de Galicia dispuxonesta 28ª edición cun módulo dentro do stand de España, baixo a coordinación da OET de Toronto, a través do cal promocionou Galicia como destino turístico.

O produto galego estrela neste mercado segue sendo o Camiño de Santiago, aínda que cada vez se aprecia maior interese por coñecer outros recursos da nosa Comunidade como a oferta cultural e tradicional, natureza e gastronomía.

O perfil dos visitantes atendidos corresponde a persoas de mediana idade -de 40 a 65 anos- cun poder adquisitivo medio-alto, que planea viaxes de longa duración, moi influídos polas conexións aéreas directas. A maioría das viaxes de lecer adoitan a ser realizadas entre xullo e outubro.

Canadá conta con dous mercados claramente diferenciados, o anglófono e o francófono, ambos de grande importancia e peso para Galicia. España é un dos destinos máis populares, xunto con Francia, Italia, Reino Unido e Alemania.

Cada ano, nesta feira nótase un incremento de iniciativas privadas canadenses interesadas en organizar viaxes e rutas polos diferentes Camiños de Santiago, ofrecendo aos clientes a posibilidade de aloxarse en Paradores, aloxamentos de turismo rural ou singulares.