A Xunta de Galicia, a través de Turismo de Galicia participa na feira especializada en turismo de congresos IBTM World que se celebra en Barcelona ata mañá.

Deste xeito, Turismo de Galicia dedica tres xornadas a promover a Comunidade galega como destino no principal certame nacional da industria do turismo de reunións e un dos máis importantes do mundo, destinado exclusivamente a profesionais do turismo.

Este ano, Turismo de Galicia participa na IBTM Wolrd con dous expositores a través dos que presentará a oferta turística galega especializada en congresos, reunións e convencións de empresa.

Coexpositores

Ademais da presenza de Turismo de Galicia, o recinto da comunidade galega ten como coexpositores ás entidades e empresas Santiago de Compostela Convention Bureau, Vigo Convention Bureau, Turismo da Coruña, Expocoruña, Palexco, OPC Galicia, Abramar DMC, DMC Galicia e o Pazo de Congresos de Santiago, que xunto ao oferta global do turismo de negocios promoverán as súas de xeito individual.

Nesta nova edición da IBTM, preto de 15.000 expositores do mercado de congresos, reunións e convencións de empresa de todo o mundo, manteñen encontros de traballo con máis de 4.000 compradores internacionais que está previsto que se acheguen a este certame especializado.

No eido do turismo de reunións, Turismo de Galicia pechará o seu calendario anual de promoción o próximo mes de decembro coa participación no Salon ILTM de Cannes (Francia), logo de promover a oferta turística galega en 11 certames celebrados tanto en España como no estranxeiro.