A directora de Turismo de Galicia, Nava Castro, pariticpou no programa matinal de TVG ‘Bos Días’ para comentar os datos de turismo rexistrados na nosa comunidade durante o 2016.

Nava Castro destacou que os turistas que visitan Galicia quedan máis e gastan máis dende hai tres anos para aquí e, así mesmo, cada vez vén un maior número de turistas. De feito, a nosa comunidade acadou máximos históricos no pasado ano 2016 tanto no que se refire aos viaxeiros aloxados, rexistrando 4.324.822, como ás pernoitas, con 8.241.822.

En relación ao perfil dos visitantes de Galicia a responsable de Turismo da Xunta sinalou que tanto os propios turistas galegos como os nacionais como os internacionais están incrementándose. Neste senso, destacou que os turistas internacionais creceron en 2016 un 7% con respecto ao ano pasado superando o 1.300.000, unha cifra histórica.

No que respecta ás diferentes tipoloxías de aloxamento, Nava Castro sinalou que rexistráronse o pasado ano incrementos xeneralizados destacando o crecemento dos apartamentos turísticos e dos establecementos de turismo.

Balance Fitur

A directora de Turismo de Galicia realizou tamén un balance na súa entrevista sobre a participación de Galicia na 37ª edición da Feira Internacional de Turismo de Madrid.

Nava Castro resaltou que no espazo galego, que contou cunha superficie de preto de 1.000 m2, estiveron representados todos os entes de promoción locais e provincias da Comunidade galega, así como, o Clúster de Turismo de Galicia.

“Fitur é cada no o pistoletazo de saída do turismo galego, o mellor escaparate para difundir e promocionar o destino Galicia.”, afirmou.

Previsións 2017

Facendo unha previsión dos vindeiros meses con respecto ao turismo en Galicia, Nava Castro destacou a importancia do Entroido galego como reclamo turístico e puxo en valor a Semana Santa, salientando a de Viveiro e Ferrol, declaradas de interese turístico internacional.