Como indicou Nava Castro durante o acto, trátase dun convenio plurianual para os anos 2017, 2018 e 2019 e que comprende actuacións nos concellos de Arzúa, Melide, Monterroso, Palas de Rei, Paradela, Pedrafita do Cebreiro, O Pino, Portomarín, Samos, Sarria e Triacastela.

 

“Trátase este dun investimento que, coas actuacións previstas, permitirá manter o Camiño Francés nas condicións óptimas para os milleiros de peregrinos que, ano a ano, a escollen como ruta para chegar a Compostela. E tamén axudará a seguir dotando de valor e calidade a experiencia de peregrinaxe pola nosa comunidade”, valorou Nava Castro.

 

Recordando que o ano pasado Galicia pechou con 277.854 peregrinos- unha cifra histórica que supera o dato acadado no último Xacobeo 2010- e, deles, o 63% escolleron o Camiño Francés, a responsable de Turismo da Xunta advertiu que é este un factor clave para converterse nunha das rutas que precisan un valor máis alto de protección así como unha atención continuada aos peregrinos.

No que se refire a este convenio, indicou que inclúe diferentes liñas de actuación, entre as que destacou as melloras das infraestruturas e bens do Camiño Francés para prestar unha boa acollida aos peregrinos, comprendendo aquí dende obras de conservación e reposición por razóns de urxencia; obras de mellora do Camiño e a súa contorna ou o establecemento e dotación de áreas de descanso, entre outras.

 

Turismo de Galicia tamén axudará naqueles gastos nos que incorran estes concellos para a atención aos peregrinos, tales como iluminación pública ou recollida de lixos e tamén en actividades de promoción e no desenvolvemento de actividades culturais e turísticas.

 

A responsable de Turismo da Xunta tamén se referiu á importancia deste convenio para garantir unha atención e información “continuada e específica” aos peregrinos de todo o Camiño Francés e do fito xacobeo. Unha actuación, coa que os concellos se comprometerán a contratar persoal con formación en turismo e coñecementos do Camiño de Santiago entre os meses de abril e setembro. E tamén deberán procurar a actualización continua da información facilitada a través das páxinas web do Concello referidas ao Camiño e o fito xacobeo.

 

Como novidade, como indicou Nava Castro, e nunha sorte de pór en valor o papel do Camiño de Santiago como un dos símbolos históricos da unidade europea, Turismo de Galicia inclúe a inclusión destes concellos na Asociación de Municipios do Camiño Francés, unha entidade de ámbito nacional sen ánimo de lucro que ten, entre os seus fins principais o de establecer relación de cooperación entre todos os seus membros.

 

“Será esta unha importante oportunidade para promover e facilitar cos medios posibles a posta en marcha de maneira conxunta de proxectos de interese común en relación co Camiño de Santiago, para fomentar o contacto entre as Asociacións de Amigos do Camiño de Santiago así como para que as distintas administracións poidan colaborar na protección e promoción do Camiño de Santiago”, indicou Nava Castro.

 

A responsable de Turismo da Xunta valorou o convenio como un acto que “reforza o compromiso da Xunta” e pon en valor “a nosa obriga de conservar este importante legado”. Do mesmo xeito, tendeu a man aos concellos para “seguir traballando xuntos e garantir que o Camiño continúe a ser un importante polo de atracción para cidadáns de todo o mundo e funcione como revulsivo económico para os concellos polos que atravesa”, concluíu.